basā-auqāt māyūsī meñ ye aalam bhī hotā hai
tabassum kī tahoñ meñ ehtimām-e-ġham bhī hotā hai

ḳhushī tanhā nahīñ aatī jilau meñ ġham bhī hotā hai
jahāñ hañstī haiñ kaliyāñ girya-e-shabnam bhī hotā hai

na.ī tahzīb ke me.amār shāyad us se ġhāfil haiñ
ba-īñ āsār-e-ālam darham-o-barham bhī hotā hai

jo āñkheñ ghūñghaToñ meñ roz ke fāqoñ se pur-nam haiñ
un āñkhoñ meñ fusūn-e-ismat-e-mariyam bhī hotā hai

ba-īmā-e-ḳhirad tum dekhte ho jis ko nafrat se
vo dīvāna ḳhirad kī asl kā mahram bhī hotā hai

rabāb-e-zindagī ke zamzamoñ par jhūmne vaale
har ik naġhme meñ nā-mālūm sā mātam bhī hotā hai

vo insāñ naaz kartā hai jo avval se sharāfat par
bahaktā hai to nañg-e-azmat-e-ādam bhī hotā hai

javānī sail-e-sher-o-bāda-e-naġhma sahī lekin
ye tūfān-e-latāfat ḳhud-baḳhud maddham bhī hotā hai

jise koī samajh le sādgī se hāsil-e-hastī
vo jab hāsil nahīñ hotā to āḳhir ġham bhī hotā hai

tabassum phuul barsātā hai jin rañgīn hoñToñ se
unhī hoñToñ pe ik din nāla-e-paiham bhī hotā hai

ba-juz zāt-e-ḳhudā 'ehsān' koī bhī nahīñ apnā
sunā thā laakh dushman hoñ to ik hamdam bhī hotā hai

basa-auqat mayusi mein ye aalam bhi hota hai
tabassum ki tahon mein ehtimam-e-gham bhi hota hai

KHushi tanha nahin aati jilau mein gham bhi hota hai
jahan hansti hain kaliyan girya-e-shabnam bhi hota hai

nai tahzib ke meamar shayad us se ghafil hain
ba-in aasar-e-alam darham-o-barham bhi hota hai

jo aankhen ghunghaTon mein roz ke faqon se pur-nam hain
un aankhon mein fusun-e-ismat-e-mariyam bhi hota hai

ba-ima-e-KHirad tum dekhte ho jis ko nafrat se
wo diwana KHirad ki asl ka mahram bhi hota hai

rabab-e-zindagi ke zamzamon par jhumne wale
har ek naghme mein na-malum sa matam bhi hota hai

wo insan naz karta hai jo awwal se sharafat par
bahakta hai to nang-e-azmat-e-adam bhi hota hai

jawani sail-e-sher-o-baada-e-naghma sahi lekin
ye tufan-e-latafat KHud-baKHud maddham bhi hota hai

jise koi samajh le sadgi se hasil-e-hasti
wo jab hasil nahin hota to aaKHir gham bhi hota hai

tabassum phul barsata hai jin rangin honTon se
unhi honTon pe ek din nala-e-paiham bhi hota hai

ba-juz zat-e-KHuda 'ehsan' koi bhi nahin apna
suna tha lakh dushman hon to ek hamdam bhi hota hai

Source: Book : Ghazaliyat-e-ahsaan Danish (Pg. 297) Author : Shabnam Parveen Publication : Asghar Publishers (2006) Edition : 2006