jab bhī ḳhalvat meñ vo yaad aa.egā
vaqt kā sail Thahar jā.egā

chāñd tum dekh rahe ho jis ko
ye bhī aañsū sā Dhalak jā.egā

ek do moḌ hī muḌ kar insāñ
bām-e-gardūñ kī ḳhabar lā.egā

maiñ ne dekhe haiñ chaman be-parda
koī gul kyā mire muñh aa.egā

husn se duur hī rahnā behtar
jo milegā vahī pachhtā.egā

aur kuchh der sitāro Thahro
us kā va.ada hai zarūr aa.egā

un kī zulfoñ kī mahak le 'dānish'
is dhundalke ko kahāñ pā.egā

jab bhi KHalwat mein wo yaad aaega
waqt ka sail Thahar jaega

chand tum dekh rahe ho jis ko
ye bhi aansu sa Dhalak jaega

ek do moD hi muD kar insan
baam-e-gardun ki KHabar laega

main ne dekhe hain chaman be-parda
koi gul kya mere munh aaega

husn se dur hi rahna behtar
jo milega wahi pachhtaega

aur kuchh der sitaro Thahro
us ka wada hai zarur aaega

un ki zulfon ki mahak le 'danish'
is dhundalke ko kahan paega

Source: Book : Karwaan-e-Ghazal (Pg. 107) Author : Farooq Argali Publication : Farid Book Depot (Pvt.) Ltd (2004) Edition : 2004