Subscribe to our newsletter and get our newest updates

Ehsan Danish

  • Ghazal


parastish-e-gham ka shukriya kya tujhe aagahi nahin


parastish-e-ġham kā shukriya kyā tujhe āgahī nahīñ
tere baġhair zindagī dard hai zindagī nahīñ

dekh ke ḳhushk o zard phuul dil hai kuchh is tarah malūl
jaise mirī ḳhizāñ ke baad daur-e-bahār hī nahīñ

daur thā ik guzar chukā nasha thā ik utar chukā
ab vo maqām hai jahāñ shikva-e-be-ruḳhī nahīñ

ishrat-e-ḳhuld ke liye zāhid-e-kaj-nazar jhuke
mashrab-e-ishq meñ to ye jurm hai bandagī nahīñ

tere sivā karūñ pasand kyā tirī kā.enāt meñ
donoñ jahāñ kī nemateñ qīmat-e-bandagī nahīñ

laakh zamāna zulm Dhaa.e vaqt na vo ḳhudā dikhā.e
jab mujhe ho yaqīñ ki tū hāsil-e-zindagī nahīñ

dil kī shaguftagī ke saath rāhat-e-mai-kada ga.ī
fursat-e-mai-kashī to hai hasrat-e-mai-kashī nahīñ

ashk-e-ravāñ kī āb-o-tāb kar na avaam meñ ḳharāb
azmat-e-ishq ko samajh girya-e-ġham hañsī nahīñ

arsa-e-furqat-o-firāq aisā tavīl to na thā
bhuul rahe ho tum mujhe maiñ koī ajnabī nahīñ

zaḳhm pe zaḳhm khā ke jī apne lahū ke ghūñT pī
aah na kar laboñ ko sī ishq hai dil-lagī nahīñ

ek vo raat thī ki jab thā mire ghar vo māhtāb
ek ye raat hai ki ab chāñd hai chāndnī nahīñ

muzhda ki nā-murād-e-ishq terī ġhazal kā hai vo rañg
vo bhī pukār uThe ki ye sehr hai shā.irī nahīñ

parastish-e-gham ka shukriya kya tujhe aagahi nahin
tere baghair zindagi dard hai zindagi nahin

dekh ke KHushk o zard phul dil hai kuchh is tarah malul
jaise meri KHizan ke baad daur-e-bahaar hi nahin

daur tha ek guzar chuka nasha tha ek utar chuka
ab wo maqam hai jahan shikwa-e-be-ruKHi nahin

ishrat-e-KHuld ke liye zahid-e-kaj-nazar jhuke
mashrab-e-ishq mein to ye jurm hai bandagi nahin

tere siwa karun pasand kya teri kaenat mein
donon jahan ki nematen qimat-e-bandagi nahin

lakh zamana zulm Dhae waqt na wo KHuda dikhae
jab mujhe ho yaqin ki tu hasil-e-zindagi nahin

dil ki shaguftagi ke sath rahat-e-mai-kada gai
fursat-e-mai-kashi to hai hasrat-e-mai-kashi nahin

ashk-e-rawan ki aab-o-tab kar na awam mein KHarab
azmat-e-ishq ko samajh girya-e-gham hansi nahin

arsa-e-furqat-o-firaq aisa tawil to na tha
bhul rahe ho tum mujhe main koi ajnabi nahin

zaKHm pe zaKHm kha ke ji apne lahu ke ghunT pi
aah na kar labon ko si ishq hai dil-lagi nahin

ek wo raat thi ki jab tha mere ghar wo mahtab
ek ye raat hai ki ab chand hai chandni nahin

muzhda ki na-murad-e-ishq teri ghazal ka hai wo rang
wo bhi pukar uThe ki ye sehr hai shairi nahin

Videos
This video is playing from YouTube Videos
This video is playing from YouTube Shafqat Salamat Ali Khan

Leave a comment

+