zehn meñ aur koī Dar nahīñ rahne detā
shor andar kā hameñ ghar nahīñ rahne detā

koī ḳhuddār bachā le to bachā le varna
peT kāñdhoñ pe koī sar nahīñ rahne detā

āsmāñ bhī vo dikhātā hai parindoñ ko na.e
haañ magar un pe koī par nahīñ rahne detā

ḳhushk āñkhoñ meñ utar aatā hai bādal ban kar
dard ehsās ko banjar nahīñ rahne detā

ek poras bhī to rahtā hai hamāre andar
jo sikandar ko sikandar nahīñ rahne detā

un meñ ik ret ke dariyā sā Thahar jaatā hai
ḳhauf āñkhoñ meñ samundar nahīñ rahne detā

hādsoñ kā hai dhuñdlakā sā 'dvij' āñkhoñ meñ
ḳhūb-sūrat koī manzar nahīñ rahne detā

zehn mein aur koi Dar nahin rahne deta
shor andar ka hamein ghar nahin rahne deta

koi KHuddar bacha le to bacha le warna
peT kandhon pe koi sar nahin rahne deta

aasman bhi wo dikhata hai parindon ko nae
han magar un pe koi par nahin rahne deta

KHushk aankhon mein utar aata hai baadal ban kar
dard ehsas ko banjar nahin rahne deta

ek poras bhi to rahta hai hamare andar
jo sikandar ko sikandar nahin rahne deta

un mein ek ret ke dariya sa Thahar jata hai
KHauf aankhon mein samundar nahin rahne deta

hadson ka hai dhundlaka sa 'dwij' aankhon mein
KHub-surat koi manzar nahin rahne deta