jo anā kī sifat hai zaatī hai
ye na aatī hai ye na jaatī hai

jab koī fikr chhaTpaTātī hai
tab kahāñ nīñd-vīñd aatī hai

aaj dānista bint-e-havvā ḳhud
ishtihāroñ ke kaam aatī hai

yuuñ dabe paañv aatī terī yaad
jis tarah sub.h dhuup aatī hai

maiñ fidā.īn ho gayā shāyad
har qadam merā ātm-ghātī hai

ab mohabbat hai maslahat-āmez
ab kahāñ jū-e-shīr laatī hai

log ab faisla batāte haiñ
aur adālat bhī maan jaatī hai

zindagī kī numūd bhī 'āzam'
sānihātī hai hādsātī hai

jo ana ki sifat hai zati hai
ye na aati hai ye na jati hai

jab koi fikr chhaTpaTati hai
tab kahan nind-wind aati hai

aaj danista bint-e-hawwa KHud
ishtihaaron ke kaam aati hai

yun dabe panw aati teri yaad
jis tarah subh dhup aati hai

main fidain ho gaya shayad
har qadam mera aatm-ghati hai

ab mohabbat hai maslahat-amez
ab kahan ju-e-shir lati hai

log ab faisla batate hain
aur adalat bhi man jati hai

zindagi ki numud bhi 'azam'
sanihati hai hadsati hai