ḳhudā bhī jāntā hai ḳhuub jo makkār baiThe haiñ
haram meñ sar-nigūñ kuchh qābil-e-finnār baiThe haiñ

gharoñ meñ saath baiThe haiñ sar-e-bāzār baiThe haiñ
naqāb apnoñ kā oḌhe āj-kal aġhyār baiThe haiñ

mohabbat kī nazar meñ jiit lī hai ham ne vo baazī
zamāne kī nazar meñ ham ki jis ko haar baiThe haiñ

ḳhatā ho jaa.e ham se jo koī to darguzar karnā
tumhārī bazm meñ ham aaj pahlī baar baiThe haiñ

zamīñ se yā falak se yā ki apnoñ se ki ġhairoñ se
batā.eñ kis tarah kis kis se ham bezār baiThe haiñ

yahī jamhūriyat kā naqs hai jo taḳht-e-shāhī par
kabhī makkār baiThe haiñ kabhī ġhaddār baiThe haiñ

adab kī mahfiloñ meñ ab kahāñ jamm-e-ġhafīr 'āzam'
yahāñ do-chār baiThe haiñ vahāñ do-chār baiThe haiñ

KHuda bhi jaanta hai KHub jo makkar baiThe hain
haram mein sar-nigun kuchh qabil-e-finnar baiThe hain

gharon mein sath baiThe hain sar-e-bazar baiThe hain
naqab apnon ka oDhe aaj-kal aghyar baiThe hain

mohabbat ki nazar mein jit li hai hum ne wo bazi
zamane ki nazar mein hum ki jis ko haar baiThe hain

KHata ho jae hum se jo koi to darguzar karna
tumhaari bazm mein hum aaj pahli bar baiThe hain

zamin se ya falak se ya ki apnon se ki ghairon se
bataen kis tarah kis kis se hum bezar baiThe hain

yahi jamhuriyat ka naqs hai jo taKHt-e-shahi par
kabhi makkar baiThe hain kabhi ghaddar baiThe hain

adab ki mahfilon mein ab kahan jamm-e-ghafir 'azam'
yahan do-chaar baiThe hain wahan do-chaar baiThe hain