aql kitnī shu.ūr kitnā hai
phir bhī tujh ko ġhurūr kitnā hai

har koī tujh se duur kitnā hai
is meñ terā qusūr kitnā hai

mīThī mīThī tumhārī bātoñ ke
pas-e-parda futūr kitnā hai

ham ko taufīq hī nahīñ hotī
ghar tirā varna duur kitnā hai

ye to ahl-e-junūñ hī jānte haiñ
hosh-e-taht-e-shu.ūr kitnā hai

satr-dar-satr paḌhne vaale dekh
qissa bainassutūr kitnā hai

daaġh hai māthe par magar 'āzam'
us ke chehre pe nuur kitnā hai

aql kitni shuur kitna hai
phir bhi tujh ko ghurur kitna hai

har koi tujh se dur kitna hai
is mein tera qusur kitna hai

miThi miThi tumhaari baaton ke
pas-e-parda futur kitna hai

hum ko taufiq hi nahin hoti
ghar tera warna dur kitna hai

ye to ahl-e-junun hi jaante hain
hosh-e-taht-e-shuur kitna hai

satr-dar-satr paDhne wale dekh
qissa bainassutur kitna hai

dagh hai mathe par magar 'azam'
us ke chehre pe nur kitna hai