kyā huā ham se jo duniyā bad-gumāñ hone lagī
apnī hastī aur bhī nazdīk-e-jāñ hone lagī

dhīre dhīre sar meñ aa kar bhar gayā barsoñ kā shor
rafta rafta ārzu-e-dil dhuāñ hone lagī

baaġh se aa.e ho merā ghar bhī chal kar dekh lo
ab bahāroñ ke dinoñ meñ bhī ḳhizāñ hone lagī

chand logoñ kī farāġhat shahr kā chehra nahīñ
ye haqīqat sab ke chehroñ se ayaañ hone lagī

yaad hai ab tak kisī ke saath ik shām-e-visāl
phir vo rāteñ jab dam-e-ruḳhsat azaañ hone lagī

bād-e-nafrat phir mohabbat ko zabāñ darkār hai
phir azīz-e-jāñ vahī urdu zabāñ hone lagī

zikr tūfān-e-havādis kā chhiḌā jo ek din
hote hote dāstāñ merī bayāñ hone lagī

saḳht manzil kaaT kar ham jab hue kuchh sust-pā
tez-rau kuchh aur bhī umr-e-ravāñ hone lagī

chhū rahī hai āsmānoñ kī bulandī phir nazar
phir hamārī zindagī anjum-nishāñ hone lagī

lo yaqīñ aayā ki dil ke dard kī tāsīr hai
ab to ik ik chiiz ham se ham-zabāñ hone lagī

ghar kī mehnat se mirī raushan hue aivān-e-zar
raushnī honī kahāñ thī aur kahāñ hone lagī

sach kahūñ 'āmir' ki ab us daur meñ jiite ho tum
rasm-e-ulfat bhī jahāñ suud o ziyāñ hone lagī

kya hua hum se jo duniya bad-guman hone lagi
apni hasti aur bhi nazdik-e-jaan hone lagi

dhire dhire sar mein aa kar bhar gaya barson ka shor
rafta rafta aarzu-e-dil dhuan hone lagi

bagh se aae ho mera ghar bhi chal kar dekh lo
ab bahaaron ke dinon mein bhi KHizan hone lagi

chand logon ki faraghat shahr ka chehra nahin
ye haqiqat sab ke chehron se ayan hone lagi

yaad hai ab tak kisi ke sath ek sham-e-visal
phir wo raaten jab dam-e-ruKHsat azan hone lagi

baad-e-nafrat phir mohabbat ko zaban darkar hai
phir aziz-e-jaan wahi urdu zaban hone lagi

zikr tufan-e-hawadis ka chhiDa jo ek din
hote hote dastan meri bayan hone lagi

saKHt manzil kaT kar hum jab hue kuchh sust-pa
tez-rau kuchh aur bhi umr-e-rawan hone lagi

chhu rahi hai aasmanon ki bulandi phir nazar
phir hamari zindagi anjum-nishan hone lagi

lo yaqin aaya ki dil ke dard ki tasir hai
ab to ek ek chiz hum se ham-zaban hone lagi

ghar ki mehnat se meri raushan hue aiwan-e-zar
raushni honi kahan thi aur kahan hone lagi

sach kahun 'amir' ki ab us daur mein jite ho tum
rasm-e-ulfat bhi jahan sud o ziyan hone lagi