khīñch kar aks fasāne se alag ho jaao
be-numū ā.ina-ḳhāne se alag ho jaao

saarā din saath raho saa.e kī sūrat apne
shaam hote hī bahāne se alag ho jaao

sher vo likkho jo pahle kahīñ maujūd na ho
ḳhvāb dekho to zamāne se alag ho jaao

shā.irī aise jhameloñ se bahut aage hai
is na.e aur purāne se alag ho jaao

niiñd meñ hazrat-e-yūsuf ko agar dekhā hai
ain mumkin hai gharāne se alag ho jaao

ehtirāman mire halqe meñ rahe ho shāmil
ehtimāman mire shāne se alag ho jaao

us ko tasvīr karo saf.ha-e-dil par 'āzar'
ġhaib kā naqsh banāne se alag ho jaao

khinch kar aks fasane se alag ho jao
be-numu aaina-KHane se alag ho jao

sara din sath raho sae ki surat apne
sham hote hi bahane se alag ho jao

sher wo likkho jo pahle kahin maujud na ho
KHwab dekho to zamane se alag ho jao

shairi aise jhamelon se bahut aage hai
is nae aur purane se alag ho jao

nind mein hazrat-e-yusuf ko agar dekha hai
ain mumkin hai gharane se alag ho jao

ehtiraman mere halqe mein rahe ho shamil
ehtimaman mere shane se alag ho jao

us ko taswir karo safha-e-dil par 'azar'
ghaib ka naqsh banane se alag ho jao