kuchh bhī nahīñ hai ḳhaak ke āzār se pare
dekhā hai maiñ ne bār-hā us paar se pare

ik naqsh khīñchtā hai mujhe ḳhvāb se udhar
ik dā.era banā huā parkār se pare

yā-rab nigāh-e-shauq ko vus.at nasīb ho
merī nazar pe baar hai dīvār se pare

tum ḳhud hī dāstān badalte ho daf.atan
ham varna dekhte nahīñ kirdār se pare

kuchh lafz jin ko ab koī tartīb chāhiye
guzre hue ḳhayāl ke iz.hār se pare

'āzar' ab un kā nām-o-nishāñ mil nahīñ rahā
uḌtā huā ġhubār hai kohsār se pare

kuchh bhi nahin hai KHak ke aazar se pare
dekha hai main ne bar-ha us par se pare

ek naqsh khinchta hai mujhe KHwab se udhar
ek daera bana hua parkar se pare

ya-rab nigah-e-shauq ko wusat nasib ho
meri nazar pe bar hai diwar se pare

tum KHud hi dastan badalte ho dafatan
hum warna dekhte nahin kirdar se pare

kuchh lafz jin ko ab koi tartib chahiye
guzre hue KHayal ke izhaar se pare

'azar' ab un ka nam-o-nishan mil nahin raha
uDta hua ghubar hai kohsar se pare