ḳhud apnī aag meñ saare charāġh jalte haiñ
ye kis havā se hamāre charāġh jalte haiñ

jahāñ utartā hai vo māhtāb paanī meñ
vahīñ kināre kināre charāġh jalte haiñ

tamām raushnī sūraj se musta.ār nahīñ
kahīñ kahīñ to hamāre charāġh jalte haiñ

tumhārā aks hai yā āftāb kā partav
ye ḳhāl-o-ḳhad haiñ ki pyāre charāġh jalte haiñ

ajiib raat utārī ga.ī mohabbat par
hamārī āñkheñ tumhāre charāġh jalte haiñ

mirī nigāh se raushan nigār-ḳhāna-e-husn
mire lahū ke sahāre charāġh jalte haiñ

na jaane kaun sī manzil hai muntazir 'āzar'
ki rahguzar meñ sitāre charāġh jalte haiñ

KHud apni aag mein sare charagh jalte hain
ye kis hawa se hamare charagh jalte hain

jahan utarta hai wo mahtab pani mein
wahin kinare kinare charagh jalte hain

tamam raushni suraj se mustaar nahin
kahin kahin to hamare charagh jalte hain

tumhaara aks hai ya aaftab ka partaw
ye KHal-o-KHad hain ki pyare charagh jalte hain

ajib raat utari gai mohabbat par
hamari aankhen tumhaare charagh jalte hain

meri nigah se raushan nigar-KHana-e-husn
mere lahu ke sahaare charagh jalte hain

na jaane kaun si manzil hai muntazir 'azar'
ki rahguzar mein sitare charagh jalte hain