'āzar' rahā hai tesha mire ḳhāndān meñ
paikar dikhā.ī dete haiñ mujh ko chaTān meñ

sab apne apne taaq meñ tharrā ke rah ga.e
kuchh to kahā havā ne charāġhoñ ke kaan meñ

maiñ apnī justujū meñ yahāñ tak pahuñch gayā
ab aa.ina hī rah gayā hai darmiyān meñ

manzar bhaTak rahe the dar-o-bām ke qarīb
maiñ so rahā thā ḳhvāb ke pichhle makān meñ

lazzat milī hai mujh ko aziyyat meñ is liye
ehsās khīñchnā thā badan kī kamān meñ

niklī nahīñ hai dil se mire bad-duā kabhī
rakkhe ḳhudā adū ko bhī apnī amaan meñ

'āzar' usī ko log na kahte hoñ āftāb
ik daaġh sā chamaktā hai jo āsmān meñ

'azar' raha hai tesha mere KHandan mein
paikar dikhai dete hain mujh ko chaTan mein

sab apne apne taq mein tharra ke rah gae
kuchh to kaha hawa ne charaghon ke kan mein

main apni justuju mein yahan tak pahunch gaya
ab aaina hi rah gaya hai darmiyan mein

manzar bhaTak rahe the dar-o-baam ke qarib
main so raha tha KHwab ke pichhle makan mein

lazzat mili hai mujh ko aziyyat mein is liye
ehsas khinchna tha badan ki kaman mein

nikli nahin hai dil se mere bad-dua kabhi
rakkhe KHuda adu ko bhi apni aman mein

'azar' usi ko log na kahte hon aaftab
ek dagh sa chamakta hai jo aasman mein