Subscribe to our newsletter and get our newest updates

Dil Shahjahanpuri

  • Ghazal


ai ishq tu ne waqif-e-manzil bana diya


ai ishq tū ne vāqif-e-manzil banā diyā
ab marhaloñ ko aur bhī mushkil banā diyā

allāh-re shauq-e-qais kī jalva-tarāziyāñ
akasr ġhubār-e-dasht ko mahmil banā diyā

maiñ ġharq ho rahā thā ki tūfān-e-ishq ne
ik mauj-e-be-qarār ko sāhil banā diyā

ham ne ik āh-e-sard ko sham-e-sahar ke saath
rūdād-e-nā-tamām kā hāsil banā diyā

ai dil ye sab amīr-e-suḳhan-var kā faiz hai
zarre ko jis ne jauhar-e-qābil banā diyā

ai ishq tu ne waqif-e-manzil bana diya
ab marhalon ko aur bhi mushkil bana diya

allah-re shauq-e-qais ki jalwa-taraaziyan
akasr ghubar-e-dasht ko mahmil bana diya

main gharq ho raha tha ki tufan-e-ishq ne
ek mauj-e-be-qarar ko sahil bana diya

hum ne ek aah-e-sard ko sham-e-sahar ke sath
rudad-e-na-tamam ka hasil bana diya

ai dil ye sab amir-e-suKHan-war ka faiz hai
zarre ko jis ne jauhar-e-qabil bana diya


Source: Book : sheerazah (Pg. 23) Author : makhmoor saeedi,Parem Gopal Mittal Publication : P -K Publication 3072 Partap stareet gola Market -Daryaganj delhi-6 (1973) Edition : 1973

Leave a comment

+