kyā chāhā thā kyā sochā thā kyā guzrī kyā baat huī
dil bhī TuuTā ghar bhī chhūTā rusvā.ī bhī saath huī

vo kyā jaane us se bichhaḌ ke ham par kyā kyā guzrī hai
sahrā jaisā din kā aalam parbat jaisī raat huī

us ke ḳhat ko kaise paḌhūñ maiñ saare lafz to bhīge haiñ
merī chhat par bādal chhā.e us ke ghar barsāt huī

yuuñ kho.e ham yaad meñ us kī goyā ḳhud ko bhuul ga.e
kisī ḳhabar hai kab din niklā kise pata kab raat huī

dil ke pyāse āñgan meñ kal yaad ke bādal yuuñ aa.e
der talak ye tan-man bhīgā be-mausam barsāt huī

kya chaha tha kya socha tha kya guzri kya baat hui
dil bhi TuTa ghar bhi chhuTa ruswai bhi sath hui

wo kya jaane us se bichhaD ke hum par kya kya guzri hai
sahra jaisa din ka aalam parbat jaisi raat hui

us ke KHat ko kaise paDhun main sare lafz to bhige hain
meri chhat par baadal chhae us ke ghar barsat hui

yun khoe hum yaad mein us ki goya KHud ko bhul gae
kisi KHabar hai kab din nikla kise pata kab raat hui

dil ke pyase aangan mein kal yaad ke baadal yun aae
der talak ye tan-man bhiga be-mausam barsat hui

Source: Book : Apna to mile koi (Pg. 31) Author : Devmani Pandey Publication : Amrit parkashan (2012) Edition : 2012