tamām nūr-e-tajallī tamām rañg-e-chaman
ye terā chāñd sā chehra ye terā gul sā badan
na Dagmagā.e qadam garche rāh-e-ulfat meñ
kahīñ the dasht-o-bayābān kahīñ the dār-o-rasan
hazār aa.e zamāne meñ inqalāb magar
mizāj husn kā badlā na ishq hī kā chalan
sabāt-o-sabr zarūrī hai aadmī ke liye
shikan jabīñ pe na aa.e ba-vaqt-e-ranj-o-mehan
ye baat aur hai nāqid rahe zamāna magar
jahāñ se miT nahīñ sakte nuqūsh-e-tesha-fan
mirā dayār hai mehr-o-vafā kā gahvāra
adū-e-mehr-o-mohabbat kā hai magar madfan
haqīqatoñ se ba-har-hāl jo gurez kare
vo shā.irī hai na hikmat na vo hunar hai na fan
har ik ko jaan zamāne meñ apnī pyārī hai
azīz-tar hai magar ham ko jaan se bhī vatan
bahut hī shor thā rañgīnī-e-jahāñ kā magar
milā na ham ko yahāñ kuchh sivā-e-rañj-o-mehan
vo jān-e-husn-o-latāfat hī ban ke aayā hai
bahār ġhuncha-ba-ġhuncha sabā chaman-ba-chaman
hazār baar huā imtihān-e-ishq magar
na jaane husn hai kyuuñ mujh se bad-gumāñ 'darshan'
tamam nur-e-tajalli tamam rang-e-chaman
ye tera chand sa chehra ye tera gul sa badan
na Dagmagae qadam garche rah-e-ulfat mein
kahin the dasht-o-bayaban kahin the dar-o-rasan
hazar aae zamane mein inqalab magar
mizaj husn ka badla na ishq hi ka chalan
sabaat-o-sabr zaruri hai aadmi ke liye
shikan jabin pe na aae ba-waqt-e-ranj-o-mehan
ye baat aur hai naqid rahe zamana magar
jahan se miT nahin sakte nuqush-e-tesha-fan
mera dayar hai mehr-o-wafa ka gahwara
adu-e-mehr-o-mohabbat ka hai magar madfan
haqiqaton se ba-har-haal jo gurez kare
wo shairi hai na hikmat na wo hunar hai na fan
har ek ko jaan zamane mein apni pyari hai
aziz-tar hai magar hum ko jaan se bhi watan
bahut hi shor tha rangini-e-jahan ka magar
mila na hum ko yahan kuchh siwa-e-ranj-o-mehan
wo jaan-e-husn-o-latafat hi ban ke aaya hai
bahaar ghuncha-ba-ghuncha saba chaman-ba-chaman
hazar bar hua imtihan-e-ishq magar
na jaane husn hai kyun mujh se bad-guman 'darshan'
Source: Mata-e-Noor
Leave a comment