qaid-e-ġham-e-hayāt se ahl-e-jahāñ mafar nahīñ
aisī milī hai shām-e-ġham jis kī koī sahar nahīñ

hai vo safar jo ishq ko jānib dost le chale
varna safar ke vāste kaun sī rahguzar nahīñ

ahl-e-ḳhirad ko chāhiye dil ke nagar meñ aa baseñ
dil sā hasīn-o-ḳhush-numā aur koī nagar nahīñ

tere karam pe hai yaqīñ garche ye jāntā huuñ maiñ
naala hai merā nā-rasā aah meñ kuchh asar nahīñ

hasrat-e-intizār kī baat na ham se pūchhiye
hai ye tavīl dāstāñ qissa-e-muḳhtasar nahīñ

luT to ga.e haiñ dil magar mil bhī ga.ī haiñ manzileñ
rahguzar-e-hayāt meñ ishq sā rāhbar nahīñ

apnā rahā na hosh jab rāz-e-hayāt pā liyā
nemat-e-be-ḳhudī samajh hosh kā ye samar nahīñ

ishq matā-e-lā-makāñ ishq matā-e-jāvedāñ
sho.ala-e-dā.emī hai ye manzar-e-yak-sharar nahīñ

'darshan'-e-mast se mileñ kholegā rāz-e-āgahī
garche vahāñ hai jis jagah apnī use ḳhabar nahīñ

qaid-e-gham-e-hayat se ahl-e-jahan mafar nahin
aisi mili hai sham-e-gham jis ki koi sahar nahin

hai wo safar jo ishq ko jaanib dost le chale
warna safar ke waste kaun si rahguzar nahin

ahl-e-KHirad ko chahiye dil ke nagar mein aa basen
dil sa hasin-o-KHush-numa aur koi nagar nahin

tere karam pe hai yaqin garche ye jaanta hun main
nala hai mera na-rasa aah mein kuchh asar nahin

hasrat-e-intizar ki baat na hum se puchhiye
hai ye tawil dastan qissa-e-muKHtasar nahin

luT to gae hain dil magar mil bhi gai hain manzilen
rahguzar-e-hayat mein ishq sa rahbar nahin

apna raha na hosh jab raaz-e-hayat pa liya
nemat-e-be-KHudi samajh hosh ka ye samar nahin

ishq mata-e-la-makan ishq mata-e-jawedan
shoala-e-daemi hai ye manzar-e-yak-sharar nahin

'darshan'-e-mast se milen kholega raaz-e-agahi
garche wahan hai jis jagah apni use KHabar nahin

Source: Mata-e-Noor