Subscribe to our newsletter and get our newest updates

Dagh Dehlvi

  • Ghazal


bhawen tanti hain KHanjar hath mein hai tan ke baiThe hain


bhaveñ tantī haiñ ḳhanjar haath meñ hai tan ke baiThe haiñ
kisī se aaj bigḌī hai ki vo yuuñ ban ke baiThe haiñ

diloñ par saikḌoñ sikke tire joban ke baiThe haiñ
kalejoñ par hazāroñ tiir is chitvan ke baiThe haiñ

ilāhī kyuuñ nahīñ uThtī qayāmat mājrā kyā hai
hamāre sāmne pahlū meñ vo dushman ke baiThe haiñ

ye gustāḳhī ye chheḌ achchhī nahīñ hai ai dil-e-nādāñ
abhī phir ruuTh jā.eñge abhī to man ke baiThe haiñ

asar hai jazb-e-ulfat meñ to khiñch kar aa hī jā.eñge
hameñ parvā nahīñ ham se agar vo tan ke baiThe haiñ

subuk ho jā.eñge gar jā.eñge vo bazm-e-dushman meñ
ki jab tak ghar meñ baiThe haiñ vo lākhoñ man ke baiThe haiñ

fusūñ hai yā duā hai yā muamma khul nahīñ saktā
vo kuchh paḌhte hue aage mire madfan ke baiThe haiñ

bahut royā huuñ maiñ jab se ye maiñ ne ḳhvāb dekhā hai
ki aap aañsū bahāte sāmne dushman ke baiThe haiñ

khaḌe hoñ zer-e-tūbā vo na dam lene ko dam bhar bhī
jo hasrat-mand tere sāya-e-dāman ke baiThe haiñ

talāsh-e-manzil-e-maqsad kī gardish uTh nahīñ saktī
kamar khole hue raste meñ ham rahzan ke baiThe haiñ

ye josh-e-girya to dekho ki jab furqat meñ royā huuñ
dar o dīvār ik pal meñ mire madfan ke baiThe haiñ

nigāh-e-shoḳh o chashm-e-shauq meñ dar-parda chhantī hai
ki vo chilman meñ haiñ nazdīk ham chilman ke baiThe haiñ

ye uThnā baiThnā mahfil meñ un kā rañg lā.egā
qayāmat ban ke uTTheñge bhabūkā ban ke baiThe haiñ

kisī kī shāmat aa.egī kisī kī jaan jā.egī
kisī kī taak meñ vo baam par ban-Than ke baiThe haiñ

qasam de kar unheñ ye pūchh lo tum rañg-Dhañg us ke
tumhārī bazm meñ kuchh dost bhī dushman ke baiThe haiñ

koī chhīñTā paḌe to 'dāġh' kalkatte chale jaa.eñ
azīmābād meñ ham muntazir sāvan ke baiThe haiñ

bhawen tanti hain KHanjar hath mein hai tan ke baiThe hain
kisi se aaj bigDi hai ki wo yun ban ke baiThe hain

dilon par saikDon sikke tere joban ke baiThe hain
kalejon par hazaron tir is chitwan ke baiThe hain

ilahi kyun nahin uThti qayamat majra kya hai
hamare samne pahlu mein wo dushman ke baiThe hain

ye gustaKHi ye chheD achchhi nahin hai ai dil-e-nadan
abhi phir ruTh jaenge abhi to man ke baiThe hain

asar hai jazb-e-ulfat mein to khinch kar aa hi jaenge
hamein parwa nahin hum se agar wo tan ke baiThe hain

subuk ho jaenge gar jaenge wo bazm-e-dushman mein
ki jab tak ghar mein baiThe hain wo lakhon man ke baiThe hain

fusun hai ya dua hai ya muamma khul nahin sakta
wo kuchh paDhte hue aage mere madfan ke baiThe hain

bahut roya hun main jab se ye main ne KHwab dekha hai
ki aap aansu bahate samne dushman ke baiThe hain

khaDe hon zer-e-tuba wo na dam lene ko dam bhar bhi
jo hasrat-mand tere saya-e-daman ke baiThe hain

talash-e-manzil-e-maqsad ki gardish uTh nahin sakti
kamar khole hue raste mein hum rahzan ke baiThe hain

ye josh-e-girya to dekho ki jab furqat mein roya hun
dar o diwar ek pal mein mere madfan ke baiThe hain

nigah-e-shoKH o chashm-e-shauq mein dar-parda chhanti hai
ki wo chilman mein hain nazdik hum chilman ke baiThe hain

ye uThna baiThna mahfil mein un ka rang laega
qayamat ban ke uTThenge bhabuka ban ke baiThe hain

kisi ki shamat aaegi kisi ki jaan jaegi
kisi ki tak mein wo baam par ban-Than ke baiThe hain

qasam de kar unhen ye puchh lo tum rang-Dhang us ke
tumhaari bazm mein kuchh dost bhi dushman ke baiThe hain

koi chhinTa paDe to 'dagh' kalkatte chale jaen
azimabaad mein hum muntazir sawan ke baiThe hain

RECITATIONS Fasih Akmal



00:00/00:00 bhawen tanti hain KHanjar hath mein hai tan ke baiThe hain Fasih Akmal

Leave a comment

+