ham ko chheḌā to machal jā.eñge armāñ kī tarah
ham pareshāñ haiñ tirī zulf-e-pareshāñ kī tarah

har galī aa.ī nazar kūcha-e-jānāñ kī tarah
ham ko duniyā ye lagī shahr-e-nigārāñ kī tarah

kam na hogī ye ḳhalish dil kī kisī bhī sūrat
dil meñ sau ġham haiñ makīñ ḳhār-e-muġhīlāñ kī tarah

log ruk ruk ke chale jānib-e-manzil lekin
ham rahe garm-e-safar gardish-e-daurāñ kī tarah

ab to har shaḳhs pe hotā hai gumāñ qātil kā
koī miltā hī nahīñ aadmī insāñ kī tarah

ham ne baḳhshe haiñ añdheroñ ko ujāle lekin
ham hī be-nūr rahe gor-e-ġharībāñ kī tarah

ham 'kañval' aap meñ rahte haiñ magar us se alag
ham to gulshan meñ bhī rahte haiñ bayābāñ kī tarah

hum ko chheDa to machal jaenge arman ki tarah
hum pareshan hain teri zulf-e-pareshan ki tarah

har gali aai nazar kucha-e-jaanan ki tarah
hum ko duniya ye lagi shahr-e-nigaran ki tarah

kam na hogi ye KHalish dil ki kisi bhi surat
dil mein sau gham hain makin KHar-e-mughilan ki tarah

log ruk ruk ke chale jaanib-e-manzil lekin
hum rahe garm-e-safar gardish-e-dauran ki tarah

ab to har shaKHs pe hota hai guman qatil ka
koi milta hi nahin aadmi insan ki tarah

hum ne baKHshe hain andheron ko ujale lekin
hum hi be-nur rahe gor-e-ghariban ki tarah

hum 'kanwal' aap mein rahte hain magar us se alag
hum to gulshan mein bhi rahte hain bayaban ki tarah

Source: Book : SAAZ-O-NAVA (Pg. 22) Publication : Raghu Nath suhai ummid