khultī hai chāñdnī jahāñ vo koī baam aur hai
dil ko jahāñ sukūñ mile vo to maqām aur hai

kahtī hai ruuh jism se shāyad tujhe ḳhabar nahīñ
merā maqām tū nahīñ merā maqām aur hai

sahmī huī ye ḳhāmushī hoñToñ kī tere kapkapī
kahtī hai saaf nāma-bar kuchh to payām aur hai

shikva-e-be-ruḳhī pe vo kahne lage ki dekhiye
nazroñ kī baat aur hai dil kā salām aur hai

piite rahe haiñ umr-bhar lekin vahī hai tishnagī
jis kā nasha hai jāvedāñ vo koī jaam aur hai

vaqt-e-gunāh der tak kahtā hai mujh se dil mirā
kār-e-hayāt-e-ishq meñ terā to kaam aur hai

har shai pe is jahān kī pardā hai ik fareb kā
kahte haiñ sab 'kañval' mujhe go merā naam aur hai

khulti hai chandni jahan wo koi baam aur hai
dil ko jahan sukun mile wo to maqam aur hai

kahti hai ruh jism se shayad tujhe KHabar nahin
mera maqam tu nahin mera maqam aur hai

sahmi hui ye KHamushi honTon ki tere kapkapi
kahti hai saf nama-bar kuchh to payam aur hai

shikwa-e-be-ruKHi pe wo kahne lage ki dekhiye
nazron ki baat aur hai dil ka salam aur hai

pite rahe hain umr-bhar lekin wahi hai tishnagi
jis ka nasha hai jawedan wo koi jam aur hai

waqt-e-gunah der tak kahta hai mujh se dil mera
kar-e-hayat-e-ishq mein tera to kaam aur hai

har shai pe is jahan ki parda hai ek fareb ka
kahte hain sab 'kanwal' mujhe go mera nam aur hai

Source: Book : SAAZ-O-NAVA (Pg. 30) Publication : Raghu Nath suhai ummid