Subscribe to our newsletter and get our newest updates

Charkh Chinioti

  • Ghazal


be-KHudi mein hai na wo pi kar sambhal jaane mein hai


be-ḳhudī meñ hai na vo pī kar sambhal jaane meñ hai
lutf pā-e-yār par jo laġhzisheñ khāne meñ hai

tere va.ade terī yādeñ tere naġhme tere ḳhvāb
husn se bharpūr daulat mere kāshāne meñ hai

sāġhar-o-mīnā meñ lahrātī hai har mauj-e-sharāb
ik javānī kā talātum aaj maiḳhāne meñ hai

bazm-e-duniyā meñ haiñ husn-o-ishq yuuñ jalva-numā
raushnī hai sham.a meñ to soz parvāne meñ hai

mai kī ik ik buuñd se tūfān-e-mastī hai ayaañ
kis kī mai-bār añkhḌiyoñ kā aks paimāne meñ hai

nuur kī bārish abhī hone de thoḌī der aur
ik zarā sī der hī to raat Dhal jaane meñ hai

laakh fitrat ne dikhā.ī barq kī chashmak-zanī
us meñ vo shoḳhī kahāñ jo tere sharmāne meñ hai

jaan bhī dil bhī jigar bhī ārzū-e-vasl bhī
un ke pesh apnā sabhī kuchh aaj nazrāne meñ hai

mai ubhar kar jaam meñ añgḌā.iyāñ lene lagī
kaisā madd-o-jazr saaqī tere maiḳhāne meñ hai

'charḳh' maiñ nā-āshnā huuñ hijr ke māhaul se
vasl kā rañgīn pahlū mere afsāne meñ hai

be-KHudi mein hai na wo pi kar sambhal jaane mein hai
lutf pa-e-yar par jo laghzishen khane mein hai

tere wade teri yaaden tere naghme tere KHwab
husn se bharpur daulat mere kashane mein hai

saghar-o-mina mein lahraati hai har mauj-e-sharab
ek jawani ka talatum aaj maiKHane mein hai

bazm-e-duniya mein hain husn-o-ishq yun jalwa-numa
raushni hai shama mein to soz parwane mein hai

mai ki ek ek bund se tufan-e-masti hai ayan
kis ki mai-bar ankhDiyon ka aks paimane mein hai

nur ki barish abhi hone de thoDi der aur
ek zara si der hi to raat Dhal jaane mein hai

lakh fitrat ne dikhai barq ki chashmak-zani
us mein wo shoKHi kahan jo tere sharmane mein hai

jaan bhi dil bhi jigar bhi aarzu-e-wasl bhi
un ke pesh apna sabhi kuchh aaj nazrane mein hai

mai ubhar kar jam mein angDaiyan lene lagi
kaisa madd-o-jazr saqi tere maiKHane mein hai

'charKH' main na-ashna hun hijr ke mahaul se
wasl ka rangin pahlu mere afsane mein hai


Source: Husn-e-adab

Leave a comment

+