ghaḌī-bhar ḳhalvatoñ ko aañch de kar bujh gayā sūraj
kisī ke dard kī lai par kahāñ tak nāchtā sūraj

nigāhoñ meñ na.e andāz se phir raushnī hogī
jab ug aa.egā zehnoñ meñ hamāre ik nayā sūraj

zamīñ kā karb auj-e-āsmāñ par bhī jhalak uTThā
nasheb-e-koh par jur.at se jab jab aa milā sūraj

hamāre ghar ke āñgan meñ sitāre bujh ga.e lākhoñ
hamārī ḳhvāb gāhoñ meñ na chamkā sub.h kā sūraj

shabistāñ-dar-shabistāñ zulmatoñ kī ek yūrish hai
har ik dāman se lipTā hai laraztā hāñptā sūraj

hamāre bām-e-dar se aaj bhī lipTī hai tārīkī
hamāre āsmānoñ meñ batāo kab ugā sūraj

sunā dī dāstāñ apnī jo ham ne be-zabāñ ho kar
misāl-e-qatra shabnam bikhar kar ro paḌā sūraj

ghaDi-bhar KHalwaton ko aanch de kar bujh gaya suraj
kisi ke dard ki lai par kahan tak nachta suraj

nigahon mein nae andaz se phir raushni hogi
jab ug aaega zehnon mein hamare ek naya suraj

zamin ka karb auj-e-asman par bhi jhalak uTTha
nasheb-e-koh par jurat se jab jab aa mila suraj

hamare ghar ke aangan mein sitare bujh gae lakhon
hamari KHwab gahon mein na chamka subh ka suraj

shabistan-dar-shabistan zulmaton ki ek yurish hai
har ek daman se lipTa hai larazta hanpta suraj

hamare baam-e-dar se aaj bhi lipTi hai tariki
hamare aasmanon mein batao kab uga suraj

suna di dastan apni jo hum ne be-zaban ho kar
misal-e-qatra shabnam bikhar kar ro paDa suraj

Source: Sulagti Soch Ke Saye