Warning: session_start(): open(/tmp/sess_7chvhnlhoitpjjmvpo7jq9c8l4, O_RDWR) failed: No space left on device (28) in /razi/eraazi/darbari/chunmun/index.php on line 15
KHizan ke jaur se waqif koi bahaar na ho

Subscribe to our newsletter and get our newest updates

Yagana Changezi

  • Ghazal


KHizan ke jaur se waqif koi bahaar na ho


ḳhizāñ ke jaur se vāqif koī bahār na ho
kisī kā pairahan-e-husn tār-tār na ho

ba-rañg-e-sabza-e-begāna rauñd Daale falak
mujhe bahār bhī aa.e to sāz-gār na ho

ḳhizāñ ke aate hī gulchīñ ne pher liiñ āñkheñ
kisī se koī vafā kā umīd-vār na ho

Thahar Thahar dil-e-vahshī bahār aane de
abhī se bahr-e-ḳhudā itnā be-qarār na ho

Tapak ke āñkhoñ se aa.e lahū jo dāman tak
to is bahār se behtar koī bahār na ho

hayā kī baat hai ab tak qafas meñ zinda huuñ
chaman meñ jā.ūñ to nargis se aañkh chaar na ho

bahār aa.ī hai ghuT ghuT ke jaan de bulbul
qafas meñ nik.hat-e-gul kī umīd-vār na ho

ishāra-e-gul-o-bulbul pe chashmak-e-nargis
ilāhī raaz kisī kā bhī āshkār na ho

bichhā hai dām-e-tamannā asiir ho bulbul
qafas kī yaad meñ is tarah be-qarār na ho

asīr-e-dām na honā zarā sambhal ai dil
ḳhayāl-e-gesū-e-pur-ḳham gale kā baar na ho

jo dekh le mujhe saaqī nashīlī āñkhoñ se
ye mast phir kabhī sharminda-e-ḳhumār na ho

abas hai zikr-e-sharāb-e-tahūr aur vaa.iz
vo baat kar jo kisī dil ko nāgavār na ho

visāl jab nahīñ mumkin to dil pe jabr achchhā
vo kyā kare jise dil hī par iḳhtiyār na ho

vo tiir kyā jo kisī ko na kar sake bismil
nigāh-e-nāz vo kyā hai jo dil ke paar na ho

mizāj-e-yār mukaddar na hone paa.e 'yās'
buland dāman-e-zīñ kahīñ se ġhubār na ho

KHizan ke jaur se waqif koi bahaar na ho
kisi ka pairahan-e-husn tar-tar na ho

ba-rang-e-sabza-e-begana raund Dale falak
mujhe bahaar bhi aae to saz-gar na ho

KHizan ke aate hi gulchin ne pher lin aankhen
kisi se koi wafa ka umid-war na ho

Thahar Thahar dil-e-wahshi bahaar aane de
abhi se bahr-e-KHuda itna be-qarar na ho

Tapak ke aankhon se aae lahu jo daman tak
to is bahaar se behtar koi bahaar na ho

haya ki baat hai ab tak qafas mein zinda hun
chaman mein jaun to nargis se aankh chaar na ho

bahaar aai hai ghuT ghuT ke jaan de bulbul
qafas mein nikhat-e-gul ki umid-war na ho

ishaara-e-gul-o-bulbul pe chashmak-e-nargis
ilahi raaz kisi ka bhi aashkar na ho

bichha hai dam-e-tamanna asir ho bulbul
qafas ki yaad mein is tarah be-qarar na ho

asir-e-dam na hona zara sambhal ai dil
KHayal-e-gesu-e-pur-KHam gale ka bar na ho

jo dekh le mujhe saqi nashili aankhon se
ye mast phir kabhi sharminda-e-KHumar na ho

abas hai zikr-e-sharab-e-tahur aur waiz
wo baat kar jo kisi dil ko nagawar na ho

visal jab nahin mumkin to dil pe jabr achchha
wo kya kare jise dil hi par iKHtiyar na ho

wo tir kya jo kisi ko na kar sake bismil
nigah-e-naz wo kya hai jo dil ke par na ho

mizaj-e-yar mukaddar na hone pae 'yas'
buland daman-e-zin kahin se ghubar na ho


Source: Book : Kulliyat-e-Yagana (Pg. 154) Author : Meerza Yagana Changezi Lukhnawi Publication : Farib Book Depot (P) Ltd. (2005) Edition : 2005

Leave a comment

+