phir lauT ke aayā huuñ tanhā.ī ke jañgal meñ
ik shahar-e-tasavvur hai ehsās ke har-pal meñ

tū misr kī malika hai maiñ yūsuf-e-kan.āñ huuñ
afsos magar gum haiñ tafrīq ke daldal meñ

insān kī duniyā meñ insāñ hai pareshāñ kyuuñ
machhlī to nahīñ hotī bechain kabhī jal meñ

har fikr ke chehre par sau zaḳhm haiñ maazī ke
ik lafz nahīñ zinda āvāz ke maqtal meñ

chuTkī meñ masalte haiñ tinke bhī pahāḌoñ ko
jab ḳhuun simaTtā hai mazlūm ke āñchal meñ

phir chhoḌ diyā tanhā duniyā ne 'ḳhayāl' ham ko
phir zehn pareshāñ hai jazbāt kī halchal meñ

phir lauT ke aaya hun tanhai ke jangal mein
ek shahar-e-tasawwur hai ehsas ke har-pal mein

tu misr ki malika hai main yusuf-e-kanan hun
afsos magar gum hain tafriq ke daldal mein

insan ki duniya mein insan hai pareshan kyun
machhli to nahin hoti bechain kabhi jal mein

har fikr ke chehre par sau zaKHm hain mazi ke
ek lafz nahin zinda aawaz ke maqtal mein

chuTki mein masalte hain tinke bhi pahaDon ko
jab KHun simaTta hai mazlum ke aanchal mein

phir chhoD diya tanha duniya ne 'KHayal' hum ko
phir zehn pareshan hai jazbaat ki halchal mein