Subscribe to our newsletter and get our newest updates

Chandrabhan Khayal

  • Ghazal


koi dana koi diwana mila


koī daanā koī dīvāna milā
shahar meñ har shaḳhs begāna milā

maiñ use pahchān to letā magar
jab milā vo ban ke afsāna milā

niim ke pattoñ sī kaḌvī har ḳhushī
dekhiye mujh ko ye nazrāna milā

shor thā vo paikar-e-paikār hai
azm us kā bhī marīzāna milā

zindagī ke naam par mujh ko 'ḳhayāl'
ek zahrīlā siyah-ḳhāna milā

koi dana koi diwana mila
shahar mein har shaKHs begana mila

main use pahchan to leta magar
jab mila wo ban ke afsana mila

nim ke patton si kaDwi har KHushi
dekhiye mujh ko ye nazrana mila

shor tha wo paikar-e-paikar hai
azm us ka bhi marizana mila

zindagi ke nam par mujh ko 'KHayal'
ek zahrila siyah-KHana mila


Leave a comment

+