Subscribe to our newsletter and get our newest updates

Yagana Changezi

  • Ghazal


charagh-e-zist bujha dil se ek dhuan nikla


charāġh-e-zīst bujhā dil se ik dhuāñ niklā
lagā ke aag mire ghar se mehmāñ niklā

dil apnā ḳhaak thā phir ḳhaak ko jalānā kyā
na koī sho.ala uThā aur na kuchh dhuāñ niklā

suneñge chheḌ ke afsāna-e-dil-e-marhūm
idhar se mulk-e-adam kā jo kārvāñ niklā

taḌap ke ābla-pā uTh khaḌe hue āḳhir
talāsh-e-yār meñ jab koī kārvāñ niklā

lahū lagā ke shahīdoñ meñ ho ga.e dāḳhil
havas to niklī magar hausla kahāñ niklā

harīm-e-nāz meñ shāyad kisī ko daḳhl nahīñ
dil aziiz bhī nā-ḳhvāñda mehmāñ niklā

nihāñ thā ḳhāna-e-dil meñ hī shāhid-e-maqsūd
jo be-nishāñ thā vo dīvār-e-darmiyāñ niklā

hai fann-e-ishq kā ustād bas dil-e-vahshī
marīz-e-ġham kā yahī ik mizāj-dāñ niklā

lagā hai dil ko ab anjām-kār kā khaTkā
bahār-e-gul se bhī ik pahlū-e-ḳhizāñ niklā

zamāna phir gayā chalne lagī havā ulTī
chaman ko aag lagā kar jo bāġhbāñ niklā

hamāre sabr kī khāte haiñ ab qasam aġhyār
jafā-kashī kā maza ba.ad-e-imtihāñ niklā

ḳhushī se ho ga.e bad-ḳhvāh mere shādī-e-marg
kafan pahan ke jo maiñ ghar se nā-gahāñ niklā

ajal se baḌh ke muhāfiz nahīñ koī apnā
ḳhudā kī shaan ki dushman nigāh-bāñ niklā

dikhāyā gor-e-sikandar ne baḌh ke ā.īna
jo sar uThā ke koī zer-e-āsmāñ niklā

lahad se baḌh ke nahīñ koī gosha-e-rāhat
qayāmat aa.ī jo is ghar se mehmāñ niklā

ab apnī ruuh hai aur sair-e-ālam-e-bālā
kueñ se yūsuf-e-gum-karda-kārvāñ niklā

kalām-e-'yās' se duniyā meñ phir ik aag lagī
ye kaun hazrat-e-'ātish' kā ham-zabāñ niklā

charagh-e-zist bujha dil se ek dhuan nikla
laga ke aag mere ghar se mehman nikla

dil apna KHak tha phir KHak ko jalana kya
na koi shoala uTha aur na kuchh dhuan nikla

sunenge chheD ke afsana-e-dil-e-marhum
idhar se mulk-e-adam ka jo karwan nikla

taDap ke aabla-pa uTh khaDe hue aaKHir
talash-e-yar mein jab koi karwan nikla

lahu laga ke shahidon mein ho gae daKHil
hawas to nikli magar hausla kahan nikla

harim-e-naz mein shayad kisi ko daKHl nahin
dil aziz bhi na-KHwanda mehman nikla

nihan tha KHana-e-dil mein hi shahid-e-maqsud
jo be-nishan tha wo diwar-e-darmiyan nikla

hai fann-e-ishq ka ustad bas dil-e-wahshi
mariz-e-gham ka yahi ek mizaj-dan nikla

laga hai dil ko ab anjam-kar ka khaTka
bahaar-e-gul se bhi ek pahlu-e-KHizan nikla

zamana phir gaya chalne lagi hawa ulTi
chaman ko aag laga kar jo baghban nikla

hamare sabr ki khate hain ab qasam aghyar
jafa-kashi ka maza baad-e-imtihan nikla

KHushi se ho gae bad-KHwah mere shadi-e-marg
kafan pahan ke jo main ghar se na-gahan nikla

ajal se baDh ke muhafiz nahin koi apna
KHuda ki shan ki dushman nigah-ban nikla

dikhaya gor-e-sikandar ne baDh ke aaina
jo sar uTha ke koi zer-e-asman nikla

lahad se baDh ke nahin koi gosha-e-rahat
qayamat aai jo is ghar se mehman nikla

ab apni ruh hai aur sair-e-alam-e-baala
kuen se yusuf-e-gum-karda-karwan nikla

kalam-e-'yas' se duniya mein phir ek aag lagi
ye kaun hazrat-e-'atish' ka ham-zaban nikla


Source: Book : Kulliyat-e-Yagana (Pg. 226) Author : Meerza Yagana Changezi Lukhnawi Publication : Farib Book Depot (P) Ltd. (2005) Edition : 2005

Leave a comment

+