roz kahāñ se koī nayā-pan apne aap meñ lā.eñge
tum bhī tañg aa jāoge ik din ham bhī uktā jā.eñge

chaḌhtā dariyā ek na ik din ḳhud hī kināre kāTegā
apne hañste chehre kitne tūfānoñ ko chhupā.eñge

aag pe chalte chalte ab to ye ehsās bhī kho baiThe
kyā hogā zaḳhmoñ kā mudāvā dāman kaise bachā.eñge

vo bhī koī ham hī sā ma.asūm gunāhoñ kā putlā thā
nāhaq us se laḌ baiThe the ab mil jaa.e manāeñge

is jānib ham us jānib tum biich meñ haa.il ek alaav
kab tak ham tum apne apne ḳhvāboñ ko jhulsā.eñge

sarmā kī rut kaaT ke aane vaale parindo ye to kaho
duur des ko jaane vaale kab tak lauT ke ā.eñge

tez havā.eñ ā.ankhoñ meñ to ret dukhoñ kī bhar hī ga.iiñ
jalte lamhe rafta rafta dil ko bhī jhulsā.eñge

mahfil mahfil apnā ta.alluq aaj hai ik mauzū-e-suḳhan
kal tak tark-e-ta.alluq ke bhī afsāne ban jā.eñge

roz kahan se koi naya-pan apne aap mein laenge
tum bhi tang aa jaoge ek din hum bhi ukta jaenge

chaDhta dariya ek na ek din KHud hi kinare kaTega
apne hanste chehre kitne tufanon ko chhupaenge

aag pe chalte chalte ab to ye ehsas bhi kho baiThe
kya hoga zaKHmon ka mudawa daman kaise bachaenge

wo bhi koi hum hi sa masum gunahon ka putla tha
nahaq us se laD baiThe the ab mil jae manaenge

is jaanib hum us jaanib tum bich mein hail ek alaw
kab tak hum tum apne apne KHwabon ko jhulsaenge

sarma ki rut kaT ke aane wale parindo ye to kaho
dur des ko jaane wale kab tak lauT ke aaenge

tez hawaen aaankhon mein to ret dukhon ki bhar hi gain
jalte lamhe rafta rafta dil ko bhi jhulsaenge

mahfil mahfil apna talluq aaj hai ek mauzu-e-suKHan
kal tak tark-e-talluq ke bhi afsane ban jaenge

Source: Shab Khoon(Shumara Number-065)