vo nazar ā.īna-fitrat hī sahī
mujhe hairat hai to hairat hī sahī

zindagī dāġh-e-mohabbat hī sahī
aap se duur kī nisbat hī sahī

tum na chāho to nahīñ kaT saktī
ek lamhe kī masāfat hī sahī

dil mohabbat kī adā chāhtā hai
ek aañsū dam-e-ruḳhsat hī sahī

āb-e-haivāñ bhī nahīñ mujh pe harām
zahr kī mujh ko zarūrat hī sahī

apnī taqdīr meñ sannāTā hai
ek hañgāme kī hasrat hī sahī

is qadar shor-e-tarab kyā ma.anī
jāgne kī mujhe aadat hī sahī

bazm-e-rindāñ se ta.alluq kaisā
aap kī mez pe sharbat hī sahī

hadd-e-manzil hai muqarrar 'bāqī'
rahrav-e-shauq ko ujlat hī sahī

wo nazar aaina-fitrat hi sahi
mujhe hairat hai to hairat hi sahi

zindagi dagh-e-mohabbat hi sahi
aap se dur ki nisbat hi sahi

tum na chaho to nahin kaT sakti
ek lamhe ki masafat hi sahi

dil mohabbat ki ada chahta hai
ek aansu dam-e-ruKHsat hi sahi

aab-e-haiwan bhi nahin mujh pe haram
zahr ki mujh ko zarurat hi sahi

apni taqdir mein sannaTa hai
ek hangame ki hasrat hi sahi

is qadar shor-e-tarab kya mani
jagne ki mujhe aadat hi sahi

bazm-e-rindan se talluq kaisa
aap ki mez pe sharbat hi sahi

hadd-e-manzil hai muqarrar 'baqi'
rahraw-e-shauq ko ujlat hi sahi

Source: Book : Bar-e-Safar (Pg. 97) Author : Baqi Siddiqui Publication : Maktaba Urdu Daijest, Lahore (1969) Edition : 1969