Subscribe to our newsletter and get our newest updates

Baqaullah Baqa

  • Ghazal


sair mein teri hai bulbul bostan be-kar hai


sair meñ terī hai bulbul bostāñ be-kār hai
bostāñ ġhairat se ḳhud ujḌā ḳhizāñ be-kār hai

chhoḌ kar aañsū ko laḳht-e-dil gayā ham-rāh-e-āh
naav ḳhushkī meñ chalī āb-e-ravāñ be-kār hai

gah zamīñ se baam par huuñ baam se gah bar zamīñ
is tapish se apne ghar kī nardbāñ be-kār hai

aa.ī ab fasl-e-gul aur mujh andalīb-e-zār kā
hai nasheman shāḳh-e-gul par āshiyāñ be-kār hai

yaar se aur ham se mahfil meñ bachā kar chashm-e-ġhair
hai suḳhan iimā meñ bāham aur zabāñ be-kār hai

mere Dar se tū ne biThlāyā thā dar par pāsbāñ
so maiñ hasrat se muā ab pāsbāñ be-kār hai

ḳhalq ko maare hai chashm us kī muattal hai qazā
fitna hai us kī nigah meñ āsmāñ be-kār hai

māñgtā huuñ bosa maiñ jis dam to us dam yaar ke
kaar meñ lab par nahīñ hai dil meñ haañ be-kār hai

kār-farmā dekh kar ġhairoñ pe maiñ us se kahā
kaar hai mujh se bhī kuchh bolā ki haañ be-kār hai

ai 'baqā'-e-kārvāñ is reḳhte kī har radīf
garche hai be-kār par batlā kahāñ be-kār hai

sair mein teri hai bulbul bostan be-kar hai
bostan ghairat se KHud ujDa KHizan be-kar hai

chhoD kar aansu ko laKHt-e-dil gaya ham-rah-e-ah
naw KHushki mein chali aab-e-rawan be-kar hai

gah zamin se baam par hun baam se gah bar zamin
is tapish se apne ghar ki nardban be-kar hai

aai ab fasl-e-gul aur mujh andalib-e-zar ka
hai nasheman shaKH-e-gul par aashiyan be-kar hai

yar se aur hum se mahfil mein bacha kar chashm-e-ghair
hai suKHan ima mein baham aur zaban be-kar hai

mere Dar se tu ne biThlaya tha dar par pasban
so main hasrat se mua ab pasban be-kar hai

KHalq ko mare hai chashm us ki muattal hai qaza
fitna hai us ki nigah mein aasman be-kar hai

mangta hun bosa main jis dam to us dam yar ke
kar mein lab par nahin hai dil mein han be-kar hai

kar-farma dekh kar ghairon pe main us se kaha
kar hai mujh se bhi kuchh bola ki han be-kar hai

ai 'baqa'-e-karwan is reKHte ki har radif
garche hai be-kar par batla kahan be-kar hai


Source: Deewan-e-Baqa

Leave a comment

+