Subscribe to our newsletter and get our newest updates

Baqaullah Baqa

  • Ghazal


sipah-e-ishrat pe fauj-e-gham ne jo mil ke markab baham uThae


sipāh-e-ishrat pe fauj-e-ġham ne jo mil ke markab baham uThā.e
idhar to naale kā tāshā kaḌkā udhar fuġhāñ ne alam uThā.e

is ashk o laḳht-e-jigar se ik hī faqat na mardum ko fā.eda hai
jo dur ke role adad kisī ne to la.al ke bhī raqam uThā.e

sabab raqīboñ ke bazm meñ ab ga.ī vo aapas kī ham-nashīnī
ham aan baiThe to uTh gayā vo vo aan baiThā to ham uTh aa.e

tahī-kaf aa.e the ham adam se chale bhī yaañ se to dast-e-ḳhālī
na tosha vaañ se liyā thā zar kā na saath yaañ se diram uThā.e

'baqā' jo raahī hue adam ke to vaqfa hargiz karo na dam kā
ye raah hastī kī pur-ḳhatar hai chalo yahāñ se qadam uThā.e

sipah-e-ishrat pe fauj-e-gham ne jo mil ke markab baham uThae
idhar to nale ka tasha kaDka udhar fughan ne alam uThae

is ashk o laKHt-e-jigar se ek hi faqat na mardum ko faeda hai
jo dur ke role adad kisi ne to lal ke bhi raqam uThae

sabab raqibon ke bazm mein ab gai wo aapas ki ham-nashini
hum aan baiThe to uTh gaya wo wo aan baiTha to hum uTh aae

tahi-kaf aae the hum adam se chale bhi yan se to dast-e-KHali
na tosha wan se liya tha zar ka na sath yan se diram uThae

'baqa' jo rahi hue adam ke to waqfa hargiz karo na dam ka
ye rah hasti ki pur-KHatar hai chalo yahan se qadam uThae


Source: Deewan-e-Baqa

Leave a comment

+