kabhī to yaad ke gul-dān meñ sajā.ūñ use
kabhī vo sāmne bhī ho to bhuul jā.ūñ use

khile jo haiñ mirī shāḳh-e-ḳhayāl par kuchh gul
usī kā khel hai ye kis tarah batā.ūñ use

vo ḳhushbuoñ kī tarah aa.e aur uḌ jaa.e
maiñ kaise pairahan-e-zehn meñ basā.ūñ use

patā to ho ki hai kyā karb-e-zaḳhm-e-nazzāra
na dekhnā jise chāhe vahī dikhā.ūñ use

vo harf-e-soḳhta sat.h-e-zabāñ tak aa.e to
maiñ apne lahja-e-raushan se jagmagā.ūñ use

usī ke rañg kā pahnā agar libās to kyā
usī kī tarz meñ ab sher bhī sunā.ūñ use

agar hai ishq to phir aisā ishq ho 'bāqar'
vo gungunā.e mujhe aur maiñ gungunā.ūñ use

kabhi to yaad ke gul-dan mein sajaun use
kabhi wo samne bhi ho to bhul jaun use

khile jo hain meri shaKH-e-KHayal par kuchh gul
usi ka khel hai ye kis tarah bataun use

wo KHushbuon ki tarah aae aur uD jae
main kaise pairahan-e-zehn mein basaun use

pata to ho ki hai kya karb-e-zaKHm-e-nazzara
na dekhna jise chahe wahi dikhaun use

wo harf-e-soKHta sath-e-zaban tak aae to
main apne lahja-e-raushan se jagmagaun use

usi ke rang ka pahna agar libas to kya
usi ki tarz mein ab sher bhi sunaun use

agar hai ishq to phir aisa ishq ho 'baqar'
wo gungunae mujhe aur main gungunaun use