Subscribe to our newsletter and get our newest updates

Baldev Raaj

  • Ghazal


aaj hai isar ka jazba jo parwanon ke pas


aaj hai īsār kā jazba jo parvānoñ ke paas
thī kabhī ye daulat-e-bedār insānoñ ke paas

aql hai ik āstīñ kā saañp farzānoñ ke paas
be-ḳhudī kitnī baḌī daulat hai dīvānoñ ke paas

kis kī hai duniyā ye āḳhir sāhab-e-ḳhāna hai kaun
mezbāñ dekhā nahīñ koī bhī mehmānoñ ke paas

azmat-e-dīvāngī kā shor farzānoñ meñ hai
hai ġhanīmat ye bhī rah jaa.e jo dīvānoñ ke paas

sham.a raushan ho ga.ī aa jaao jalne ke liye
ye ḳhabar jaatā hai le kar kaun parvānoñ ke paas

gaahe ābādī ke siine tak chale aate haiñ dasht
gaahe ābādī pahuñch jaatī hai vīrānoñ ke paas

ashk-e-hasrat soz-e-ġham dard-e-mohabbat dāġh-e-dil
kyā nahīñ sab kuchh hai tere ḳhasta sāmānoñ ke paas

tum na gar aate to khiñch jaate sanam-ḳhāne vahīñ
tum ne ḳhud tauhīn kī aa kar sanam-ḳhānoñ ke paas

nāḳhudā kashtī ke ruḳh ko moḌ lañgar kaaT de
mujh ko sāhil sā nazar aatā hai tūfānoñ ke paas

dekheñ ab begāne karte haiñ ishāra kis taraf
mujh ko apnoñ ne to pahuñchāyā hai begānoñ ke paas

'raaj jaane kis tarah karte haiñ sajde barahman
maiñ to ban jaatā huuñ but jā kar sanam-ḳhānoñ ke paas

aaj hai isar ka jazba jo parwanon ke pas
thi kabhi ye daulat-e-bedar insanon ke pas

aql hai ek aastin ka sanp farzanon ke pas
be-KHudi kitni baDi daulat hai diwanon ke pas

kis ki hai duniya ye aaKHir sahab-e-KHana hai kaun
mezban dekha nahin koi bhi mehmanon ke pas

azmat-e-diwangi ka shor farzanon mein hai
hai ghanimat ye bhi rah jae jo diwanon ke pas

shama raushan ho gai aa jao jalne ke liye
ye KHabar jata hai le kar kaun parwanon ke pas

gahe aabaadi ke sine tak chale aate hain dasht
gahe aabaadi pahunch jati hai viranon ke pas

ashk-e-hasrat soz-e-gham dard-e-mohabbat dagh-e-dil
kya nahin sab kuchh hai tere KHasta samanon ke pas

tum na gar aate to khinch jate sanam-KHane wahin
tum ne KHud tauhin ki aa kar sanam-KHanon ke pas

naKHuda kashti ke ruKH ko moD langar kaT de
mujh ko sahil sa nazar aata hai tufanon ke pas

dekhen ab begane karte hain ishaara kis taraf
mujh ko apnon ne to pahunchaya hai beganon ke pas

'raj jaane kis tarah karte hain sajde barahman
main to ban jata hun but ja kar sanam-KHanon ke pas


Source:

Leave a comment

+