Subscribe to our newsletter and get our newest updates

Bakhtiyar Ziya

  • Ghazal


ranj-e-na-asudgi karb-e-hunar dekhega kaun


ranj-e-nā-āsūdgī karb-e-hunar dekhegā kaun
naqsh-e-faryādī hai kis kā dīda-var dekhegā kaun

jumbish-e-lab hī se khul jā.egā ma.anī kā bharam
us ke harf-nā-shanīda kā asar dekhegā kaun

apnī duniyā tak rakho mahdūd parvāzeñ abhī
nīlgūñ pahnā.iyoñ meñ bāl-o-par dekhegā kaun

apne kamre kā koī gul-dān ḳhālī kyuuñ rahe
phuul kāġhaz ke sajā lo sūñgh kar dekhegā kaun

ik khilaunā toḌ kar chaltī banī pāgal havā
ab ye reza reza paikar joḌ kar dekhegā kaun

kitnī tahzīboñ kā madfan hai hamārī zindagī
jagmagā.e shahr meñ lekin khañDar dekhegā kaun

ranj-e-na-asudgi karb-e-hunar dekhega kaun
naqsh-e-faryaadi hai kis ka dida-war dekhega kaun

jumbish-e-lab hi se khul jaega mani ka bharam
us ke harf-na-shanida ka asar dekhega kaun

apni duniya tak rakho mahdud parwazen abhi
nilgun pahnaiyon mein baal-o-par dekhega kaun

apne kamre ka koi gul-dan KHali kyun rahe
phul kaghaz ke saja lo sungh kar dekhega kaun

ek khilauna toD kar chalti bani pagal hawa
ab ye reza reza paikar joD kar dekhega kaun

kitni tahzibon ka madfan hai hamari zindagi
jagmagae shahr mein lekin khanDar dekhega kaun


Source: Book : Shab Charagh (Pg. 31) Author : Bakhtiyar Ziya Publication : Markaz-e-adab (1993) Edition : 1993

Leave a comment

+