Subscribe to our newsletter and get our newest updates

Bakhsh Layalpuri

  • Ghazal


usi ke zulm se main haalat-e-panah mein tha


usī ke zulm se maiñ hālat-e-panāh meñ thā
har ik nafas mirā jis shaḳhs kī panāh meñ thā

chamak rahā thā vo ḳhurshīd-e-do-jahāñ kī tarah
vo haath jo ki garebān-e-kaj-kulāh meñ thā

ufuq ufuq ko payām-e-sahr diyā maiñ ne
mirā qayām agarche shab-e-siyāh meñ thā

mahak rahe the nazar meñ gulāb sapnoñ ke
khulī jo aañkh to dekhā maiñ qatl-gāh meñ thā

mire harīf mujhe rauñd kar nikal na sake
fasīl-e-sañg kī sūrat khaḌā maiñ raah meñ thā

jo baat baat pe kartā thā inqalāb kī baat
sajī salīb to vo hāmiyān-e-shāh meñ thā

adū kī fauj ne luuTā to kyā sitam ye hai
'ra.īs'-e-shahr bhī shāmil isī sipāh meñ thā

usi ke zulm se main haalat-e-panah mein tha
har ek nafas mera jis shaKHs ki panah mein tha

chamak raha tha wo KHurshid-e-do-jahan ki tarah
wo hath jo ki gareban-e-kaj-kulah mein tha

ufuq ufuq ko payam-e-sahr diya main ne
mera qayam agarche shab-e-siyah mein tha

mahak rahe the nazar mein gulab sapnon ke
khuli jo aankh to dekha main qatl-gah mein tha

mere harif mujhe raund kar nikal na sake
fasil-e-sang ki surat khaDa main rah mein tha

jo baat baat pe karta tha inqalab ki baat
saji salib to wo hamiyan-e-shah mein tha

adu ki fauj ne luTa to kya sitam ye hai
'rais'-e-shahr bhi shamil isi sipah mein tha


Source: Rooh-e-Ghazal,Pachas Sala Intekhab

Leave a comment

+