Subscribe to our newsletter and get our newest updates

Bahram ji

  • Ghazal


kufr ek rang-e-qudrat-e-be-intiha mein hai


kufr ek rañg-e-qudrat-e-be-intihā meñ hai
jis but ko dekhtā huuñ vo yād-e-ḳhudā meñ hai

āshiq hai jo ki jāma-e-sidq-o-safā meñ hai
ma.ashūq hai jo parda-e-hilm-o-hayā meñ hai

aalam hai mast sajda-e-jānāñ meñ tā-abad
mastī balā kī bāda-e-''qālū-balā'' meñ hai

īmāñ hai aks-e-ruḳh to hai gesū kā aks-e-kufr
vo kaun chiiz hai jo tirī mā-sivā meñ hai

abrū ke mahv ka.abe meñ sūrat ke dair meñ
ushshāq ruḳh kā silsila nūr-o-ziyā meñ hai

be-jalva-gāh-e-yār kahāñ ye rujū-e-ḳhalq
bahs-e-fuzūl barhaman-o-pārsā meñ hai

juuyā hai bas ki āriz-o-gesū-e-yār kā
pāband shaiḳh sajda-e-sub.h-o-masā meñ hai

raftār mo.ajaza hai to hai sehr chaal meñ
shoḳhī ajab tarah kī tire naqsh-e-pā meñ hai

terī taraf ko muslim o kāfir kī hai rujū
puujā meñ barhaman hai to zāhid duā meñ hai

maqtūl lākhoñ ho chuke shā.eq hazār-hā
lazzat ajiib yaar kī teġh-e-jafā meñ hai

ik pech-o-ḳham meñ gabr-o-musalmāñ haiñ mubtalā
vus.at balā kī yaar kī zulf-e-rasā meñ hai

'bahrām' āshiqāna ġhazal ek aur bhī
quvvat abhī bahut tirī fikr-e-rasā meñ hai

kufr ek rang-e-qudrat-e-be-intiha mein hai
jis but ko dekhta hun wo yaad-e-KHuda mein hai

aashiq hai jo ki jama-e-sidq-o-safa mein hai
mashuq hai jo parda-e-hilm-o-haya mein hai

aalam hai mast sajda-e-jaanan mein ta-abad
masti bala ki baada-e-qalu-bala mein hai

iman hai aks-e-ruKH to hai gesu ka aks-e-kufr
wo kaun chiz hai jo teri ma-siwa mein hai

abru ke mahw kabe mein surat ke dair mein
ushshaq ruKH ka silsila nur-o-ziya mein hai

be-jalwa-gah-e-yar kahan ye ruju-e-KHalq
bahs-e-fuzul barhaman-o-parsa mein hai

juya hai bas ki aariz-o-gesu-e-yar ka
paband shaiKH sajda-e-subh-o-masa mein hai

raftar moajaza hai to hai sehr chaal mein
shoKHi ajab tarah ki tere naqsh-e-pa mein hai

teri taraf ko muslim o kafir ki hai ruju
puja mein barhaman hai to zahid dua mein hai

maqtul lakhon ho chuke shaeq hazar-ha
lazzat ajib yar ki tegh-e-jafa mein hai

ek pech-o-KHam mein gabr-o-musalman hain mubtala
wusat bala ki yar ki zulf-e-rasa mein hai

'bahram' aashiqana ghazal ek aur bhi
quwwat abhi bahut teri fikr-e-rasa mein hai


Source: Deewan-e-Bahram

Leave a comment

+