ġhamgīñ nahīñ huuñ dahr meñ to shaad bhī nahīñ
ābād agar nahīñ huuñ to barbād bhī nahīñ

miltī tirī vafā kī mujhe daad bhī nahīñ
majnūñ nahīñ hai dahr meñ farhād bhī nahīñ

kahtā hai yaar jurm kī paate ho tum sazā
insāf agar nahīñ hai to be-dād bhī nahīñ

insāñ kī qadr kyā hai jo ho tere rū-ba-rū
tere muqāble meñ parī-zād bhī nahīñ

afsos kis se yaar kī khinchvā.iye shabīh
'mānī' nahīñ jahāñ meñ hai 'bahzād' bhī nahīñ

kartā hai uzr-e-jaur-o-jafā yaar tū abas
honā jo thā huā vo hameñ yaad bhī nahīñ

kushta huā huuñ abrū-e-ḳhamdār-e-yār kā
mere liye zarūrat-e-jallād bhī nahīñ

hasrat bhare hue ga.e duniyā se saikaḌoñ
tasdīq kis se kījiye shaddād bhī nahīñ

'bahrām' mere zor-e-tabī.at se hai suḳhan
shāgird maiñ nahīñ huuñ to ustād bhī nahīñ

ghamgin nahin hun dahr mein to shad bhi nahin
aabaad agar nahin hun to barbaad bhi nahin

milti teri wafa ki mujhe dad bhi nahin
majnun nahin hai dahr mein farhad bhi nahin

kahta hai yar jurm ki pate ho tum saza
insaf agar nahin hai to be-dad bhi nahin

insan ki qadr kya hai jo ho tere ru-ba-ru
tere muqable mein pari-zad bhi nahin

afsos kis se yar ki khinchwaiye shabih
'mani' nahin jahan mein hai 'bahzad' bhi nahin

karta hai uzr-e-jaur-o-jafa yar tu abas
hona jo tha hua wo hamein yaad bhi nahin

kushta hua hun abru-e-KHamdar-e-yar ka
mere liye zarurat-e-jallad bhi nahin

hasrat bhare hue gae duniya se saikaDon
tasdiq kis se kijiye shaddad bhi nahin

'bahram' mere zor-e-tabiat se hai suKHan
shagird main nahin hun to ustad bhi nahin

Source: Deewan-e-Bahram