jab ki pahlū meñ hamāre but-e-ḳhud-kām na ho
girye se shām-o-sahar kyuuñ ki hameñ kaam na ho

le gayā dil kā jo ārām hamāre yā rab
us dil-ārām ko mutlaq kabhī ārām na ho

jis ko samjhe lab-e-pāñ-ḳhurda vo mālida-misī
mardumāñ dekhiyo phūlī vo kahīñ shaam na ho

aaj tashrīf gulistāñ meñ vo mai-kash laayā
kaf-e-nargis pe dharā kyūñki bhalā jaam na ho

kar mujhe qatl vahāñ ab ki na ho koī jahāñ
tā mirī jaañ tū kahīñ ḳhalq meñ badnām na ho

dekh kar kholiyo tū kākul-e-pechāñ kī girah
ki mirā tā.ir-e-dil us ke tah-e-dām na ho

bin tire ai but-e-ḳhud-kām ye dil ko hai ḳhatar
tere āshiq kā tamām aah kahīñ kaam na ho

aaj har ek jo yaaro nazar aatā hai niDhāl
apnī abrū kī vo khīñche hue samsām na ho

hai mire shoḳh kī bālīda vo kāfir āñkheñ
jis ke ham chashm zarā nargis-e-bādām na ho

sub.h hotī hī nahīñ aur nahīñ kaTtī raat
ruḳh pe khole vo kahīñ zulf-e-siyāh-fām na ho

ai 'zafar' charḳh pe ḳhurshīd jo yuuñ kāñpe hai
jalva-gar aaj kahīñ yaar lab-e-bām na ho

jab ki pahlu mein hamare but-e-KHud-kaam na ho
girye se sham-o-sahar kyun ki hamein kaam na ho

le gaya dil ka jo aaram hamare ya rab
us dil-aram ko mutlaq kabhi aaram na ho

jis ko samjhe lab-e-pan-KHurda wo malida-misi
marduman dekhiyo phuli wo kahin sham na ho

aaj tashrif gulistan mein wo mai-kash laya
kaf-e-nargis pe dhara kyunki bhala jam na ho

kar mujhe qatl wahan ab ki na ho koi jahan
ta meri jaan tu kahin KHalq mein badnam na ho

dekh kar kholiyo tu kakul-e-pechan ki girah
ki mera tair-e-dil us ke tah-e-dam na ho

bin tere ai but-e-KHud-kaam ye dil ko hai KHatar
tere aashiq ka tamam aah kahin kaam na ho

aaj har ek jo yaro nazar aata hai niDhaal
apni abru ki wo khinche hue samsam na ho

hai mere shoKH ki baalida wo kafir aankhen
jis ke hum chashm zara nargis-e-baadam na ho

subh hoti hi nahin aur nahin kaTti raat
ruKH pe khole wo kahin zulf-e-siyah-fam na ho

ai 'zafar' charKH pe KHurshid jo yun kanpe hai
jalwa-gar aaj kahin yar lab-e-baam na ho