hamārī chaah sāhab jānte haiñ
kahūñ kyā aah sāhab jānte haiñ

jalānā āshiqoñ kā jaan ai jaañ
qayāmat vaah sāhab jānte haiñ

bhalā dene kī zulfoñ meñ diloñ ko
nirālī raah sāhab jānte haiñ

tumhārī mast āñkhoñ se hai be-ḳhud
jise āgāh sāhab jānte haiñ

tumhāre mukhḌe kī zarra jhalak hai
ki jis ko maah sāhab jānte haiñ

milo ham se vagarna phir kisī roz
kabhī nāgāh sāhab jānte haiñ

'muhib' be-tarah kuchh tum se kahegā
vahī tiir aah sāhab jānte haiñ

hamari chah sahab jaante hain
kahun kya aah sahab jaante hain

jalana aashiqon ka jaan ai jaan
qayamat wah sahab jaante hain

bhala dene ki zulfon mein dilon ko
nirali rah sahab jaante hain

tumhaari mast aankhon se hai be-KHud
jise aagah sahab jaante hain

tumhaare mukhDe ki zarra jhalak hai
ki jis ko mah sahab jaante hain

milo hum se wagarna phir kisi roz
kabhi nagah sahab jaante hain

'muhib' be-tarah kuchh tum se kahega
wahi tir aah sahab jaante hain

Source: Deewan-e-Waleeullah Muhib