vaañ rasā.ī nahīñ to phir kyā hai
ye judā.ī nahīñ to phir kyā hai

ho mulāqāt to safā.ī se
aur safā.ī nahīñ to phir kyā hai

dilrubā ko hai dilrubā.ī shart
dilrubā.ī nahīñ to phir kyā hai

gila hotā hai āshnā.ī meñ
āshnā.ī nahīñ to phir kyā hai

allāh allāh re un butoñ kā ġhurūr
ye ḳhudā.ī nahīñ to phir kyā hai

maut aa.ī to Tal nahīñ saktī
aur aa.ī nahīñ to phir kyā hai

magas-e-qāb aġhniyā honā hai
be-hayā.ī nahīñ to phir kyā hai

bosa-e-lab dil-e-shikasta ko
momyā.ī nahīñ to phir kyā hai

nahīñ rone meñ gar 'zafar' tāsīr
jag-hañsā.ī nahīñ to phir kyā hai

wan rasai nahin to phir kya hai
ye judai nahin to phir kya hai

ho mulaqat to safai se
aur safai nahin to phir kya hai

dilruba ko hai dilrubai shart
dilrubai nahin to phir kya hai

gila hota hai aashnai mein
aashnai nahin to phir kya hai

allah allah re un buton ka ghurur
ye KHudai nahin to phir kya hai

maut aai to Tal nahin sakti
aur aai nahin to phir kya hai

magas-e-qab aghniya hona hai
be-hayai nahin to phir kya hai

bosa-e-lab dil-e-shikasta ko
momyai nahin to phir kya hai

nahin rone mein gar 'zafar' tasir
jag-hansai nahin to phir kya hai

RECITATIONS Nomaan Shauque



00:00/00:00 wan rasai nahin to phir kya hai Nomaan Shauque