rā.egāñ auqāt kho kar haif khānā hai abas
ḳhūb-rūyoñ se jahāñ ke dil lagānā hai abas

kārgar hogā tirā afsūñ ye bāvar hai tujhe
us parī par ai dil-e-vahshī divānā hai abas

jiite phir aane kī pahle rakh tavaqqo dil se duur
varna kūche meñ sitam-gāroñ ke jaanā hai abas

ḳhaak ho kar ek sūrat hai gadā-o-shāh kī
gar muāfiq tujh se ai mun.im zamānā hai abas

yaad kis ko rahm jī meñ kab dimāġh-o-dil kahāñ
yaañ na aane kā mire sāhab bahānā hai abas

dil-shikan hai sub.h-dam terā hī gulchīñ baaġh meñ
āshiyāñ ai andalīb us jā banānā hai abas

ai gul-e-ḳhandāñ sabāt-e-umr hai shabnam se kam
yaañ bahār-e-rañg par hañsnā hañsānā hai abas

vaañ phire haiñ tarkash-e-mizhgāñ talāsh-e-said par
yaañ tirā dil tīr-e-hasrat kā nishānā hai abas

aabrū kahte haiñ jis ko hai 'muhib' ik qatra aab
jab Dhalak jaave to phir us kā uThānā hai abas

raegan auqat kho kar haif khana hai abas
KHub-ruyon se jahan ke dil lagana hai abas

kargar hoga tera afsun ye bawar hai tujhe
us pari par ai dil-e-wahshi diwana hai abas

jite phir aane ki pahle rakh tawaqqo dil se dur
warna kuche mein sitam-garon ke jaana hai abas

KHak ho kar ek surat hai gada-o-shah ki
gar muafiq tujh se ai munim zamana hai abas

yaad kis ko rahm ji mein kab dimagh-o-dil kahan
yan na aane ka mere sahab bahana hai abas

dil-shikan hai subh-dam tera hi gulchin bagh mein
aashiyan ai andalib us ja banana hai abas

ai gul-e-KHandan sabaat-e-umr hai shabnam se kam
yan bahaar-e-rang par hansna hansana hai abas

wan phire hain tarkash-e-mizhgan talash-e-said par
yan tera dil tir-e-hasrat ka nishana hai abas

aabru kahte hain jis ko hai 'muhib' ek qatra aab
jab Dhalak jawe to phir us ka uThana hai abas

Source: Deewan-e-Waleeullah Muhib