chup the jo but savāl ba-lab bolne lage
Thahro ki qaus-e-barq-o-lahab bolne lage

vīrāniyoñ meñ sāz-e-tarab bolne lage
jaise lahū meñ āb-e-inab bolne lage

ik rishta ehtiyāj kā sau ruup meñ milā
so ham bhī ab ba-tarz-e-talab bolne lage

ḳhāmosh be-gunāhī akelī khaḌī rahī
kuchh bolne se pahle hī sab bolne lage

pahle tum is mobile ko be-rābta karo
kam-zarf hai na jaane ye kab bolne lage

sar pīTtā hai nātiqa hairāñ hai āgahī
purze machine ke bhī adab bolne lage

barham the ḳhvāb niiñd kī retīlī os par
us par sitam ki tā.er-e-shab bolne lage

hai vaqt yā shu.ūr ye guzrā hai jo abhī
tum bhī 'ḳhalish' zabān ajab bolne lage

chup the jo but sawal ba-lab bolne lage
Thahro ki qaus-e-barq-o-lahab bolne lage

viraniyon mein saz-e-tarab bolne lage
jaise lahu mein aab-e-inab bolne lage

ek rishta ehtiyaj ka sau rup mein mila
so hum bhi ab ba-tarz-e-talab bolne lage

KHamosh be-gunahi akeli khaDi rahi
kuchh bolne se pahle hi sab bolne lage

pahle tum is mobile ko be-rabta karo
kam-zarf hai na jaane ye kab bolne lage

sar piTta hai natiqa hairan hai aagahi
purze machine ke bhi adab bolne lage

barham the KHwab nind ki retili os par
us par sitam ki taer-e-shab bolne lage

hai waqt ya shuur ye guzra hai jo abhi
tum bhi 'KHalish' zaban ajab bolne lage