kahīñ sub.h-o-shām ke darmiyāñ kahīñ māh-o-sāl ke darmiyāñ
ye mire vajūd kī saltanat hai ajab zavāl ke darmiyāñ

abhī sehn-e-jāñ meñ bichhī huī jo bahār hai use kyā kahūñ
maiñ kisī itaab kī zad meñ huuñ tū kisī malāl ke darmiyāñ

haiñ kisī ishāre ke muntazir ka.ī shahsavār khaḌe hue
ki ho garm phir koī ma.arka mire zabt-e-hāl ke darmiyāñ

nahīñ tarjumān-e-bayāñ koī jo hai parda-dār-e-sukūt hai
haiñ ye daaġh daaġh ibārateñ baḌe ehtimāl ke darmiyāñ

yahāñ zarra zarra hai dīda-var nahīñ zarra bhar koī be-ḳhabar
kisī kam-nazar ko paḌī hai kyā paḌe kyuuñ savāl ke darmiyāñ

na rahā dhuāñ na hai koī bū lo ab aa ga.e vo surāġh-jū
hai har ik nigāh gurez-ḳhū pas-e-ishti.āl ke darmiyāñ

the jo par-kushā haiñ zubūñ zubūñ the jo sar-ba-kaf hue sar-nigūñ
kahīñ kho ga.e darūñ darūñ ye kis indr-jāl ke darmiyāñ

lagī zarb aisī hai bar-mahal ki ye marhala bhī hai jāñ-gusil
hue zaḳhm phir se lahū lahū the jo indimāl ke darmiyāñ

kabhī shikva-zan kabhī nukta-chīñ kabhī bāġhiyoñ kā himāyatī
ye 'ḳhalish' hai kaun kaho use rahe e'tidāl ke darmiyāñ

kahin subh-o-sham ke darmiyan kahin mah-o-sal ke darmiyan
ye mere wajud ki saltanat hai ajab zawal ke darmiyan

abhi sehn-e-jaan mein bichhi hui jo bahaar hai use kya kahun
main kisi itab ki zad mein hun tu kisi malal ke darmiyan

hain kisi ishaare ke muntazir kai shahsawar khaDe hue
ki ho garm phir koi marka mere zabt-e-haal ke darmiyan

nahin tarjuman-e-bayan koi jo hai parda-dar-e-sukut hai
hain ye dagh dagh ibaraten baDe ehtimal ke darmiyan

yahan zarra zarra hai dida-war nahin zarra bhar koi be-KHabar
kisi kam-nazar ko paDi hai kya paDe kyun sawal ke darmiyan

na raha dhuan na hai koi bu lo ab aa gae wo suragh-ju
hai har ek nigah gurez-KHu pas-e-ishtial ke darmiyan

the jo par-kusha hain zubun zubun the jo sar-ba-kaf hue sar-nigun
kahin kho gae darun darun ye kis indr-jal ke darmiyan

lagi zarb aisi hai bar-mahal ki ye marhala bhi hai jaan-gusil
hue zaKHm phir se lahu lahu the jo indimal ke darmiyan

kabhi shikwa-zan kabhi nukta-chin kabhi baghiyon ka himayati
ye 'KHalish' hai kaun kaho use rahe e'tidal ke darmiyan