mire dil meñ hijr ke baab haiñ tujhe ab talak vahī naaz hai
jo ye jī hī lene pe hai nazar to qubūl ho ye namāz hai

yahī khoj lene ke vāste phirūñ huuñ maiñ saath nasīm ke
ki chaman meñ koī hai gul kahīñ tirī bū se mahram-e-rāz hai

koī aur qissa shurūa kar jo tamām kah sake ham-nafas
ki fasāna zulf-e-siyāh kā shab-e-hijr se bhī darāz hai

huī dil meñ jab se hai shola-zan mirī ātish-e-ishq kī har nafas
jo patañg o sham.a meñ dekhiye na vo soz hai na gudāz hai

ba-ḳhudā ki muddat-e-ishq meñ yahī baat farz hai nāsehā
ki sanam ke naqsh-e-qadam sivā nahīñ sajda-gāh-e-namāz hai

na barābar us ko bhī zāhido gino apne ka.abe kī raah ke
rah-e-ishq meñ jo qadam rakho to bahut nasheb-o-farāz hai

koī shaġhl us se nahīñ bhalā ki 'muhib' ho ishq meñ mubtalā
usī rāh-e-haq kā bane rahnumā yahī ishq agarche majāz hai

mere dil mein hijr ke bab hain tujhe ab talak wahi naz hai
jo ye ji hi lene pe hai nazar to qubul ho ye namaz hai

yahi khoj lene ke waste phirun hun main sath nasim ke
ki chaman mein koi hai gul kahin teri bu se mahram-e-raaz hai

koi aur qissa shurua kar jo tamam kah sake ham-nafas
ki fasana zulf-e-siyah ka shab-e-hijr se bhi daraaz hai

hui dil mein jab se hai shola-zan meri aatish-e-ishq ki har nafas
jo patang o shama mein dekhiye na wo soz hai na gudaz hai

ba-KHuda ki muddat-e-ishq mein yahi baat farz hai naseha
ki sanam ke naqsh-e-qadam siwa nahin sajda-gah-e-namaz hai

na barabar us ko bhi zahido gino apne kabe ki rah ke
rah-e-ishq mein jo qadam rakho to bahut nasheb-o-faraaz hai

koi shaghl us se nahin bhala ki 'muhib' ho ishq mein mubtala
usi rah-e-haq ka bane rahnuma yahi ishq agarche majaz hai

Source: Deewan-e-Waleeullah Muhib