mahsūs ho rahā hai jo ġham merī zaat kā
sach pūchhiye to dard hai vo kā.enāt kā

ghar kī ghuTan se duur nikal jaa.e aadmī
saḌkoñ pe ḳhauf ho na agar hādsāt kā

apne badan ko aur thakāo na dosto
Dhal jaa.e din to bojh uThānā hai raat kā

ik dūsre ko zahr pilāte haiñ log ab
bātoñ meñ shahd ghol ke qand-o-nabāt kā

har shaḳhs tere shahr meñ mujrim banā huā
phirtā hai DhūñDhtā huā rishta najāt kā

is meñ kisī kā aks na chehra dikhā.ī de
dhuñdlā gayā hai aa.ina 'ḳhāvar' hayāt kā

mahsus ho raha hai jo gham meri zat ka
sach puchhiye to dard hai wo kaenat ka

ghar ki ghuTan se dur nikal jae aadmi
saDkon pe KHauf ho na agar hadsat ka

apne badan ko aur thakao na dosto
Dhal jae din to bojh uThana hai raat ka

ek dusre ko zahr pilate hain log ab
baaton mein shahd ghol ke qand-o-nabaat ka

har shaKHs tere shahr mein mujrim bana hua
phirta hai DhunDhta hua rishta najat ka

is mein kisi ka aks na chehra dikhai de
dhundla gaya hai aaina 'KHawar' hayat ka

Source: Huroof