tum ko maiñ jab salām kartā huuñ
tab fuġhāñ gaam gaam kartā huuñ

ġhuncha-o-gul kī ḳhasta-hālī kā
zikr meñ sub.h-o-shām kartā huuñ

be-sutūñ kaaT kar khaḌā huuñ maiñ
kohkan jaise kaam kartā huuñ

ātish-e-ishq jab jalātī hai
jal ke maiñ nosh-e-jām kartā huuñ

sher hotā nahīñ hai jab 'bābar'
us kā kuchh ehtimām kartā huuñ

tum ko main jab salam karta hun
tab fughan gam gam karta hun

ghuncha-o-gul ki KHasta-haali ka
zikr mein subh-o-sham karta hun

be-sutun kaT kar khaDa hun main
kohkan jaise kaam karta hun

aatish-e-ishq jab jalati hai
jal ke main nosh-e-jam karta hun

sher hota nahin hai jab 'babar'
us ka kuchh ehtimam karta hun