nahīñ duniyā meñ sivā ḳhār-o-ḳhas-e-kūcha-e-dost
sar-e-shorīda kī ḳhvāhish ba-kulāhe gaahe

ḳhūn-e-ushshāq kā da.avā mire qātil tujh par
hote isbāt na dekhā ba-gavāhe gaahe

hai bahār aane kī kuchh dhuum ki aage to na thā
dil-e-dīvāna ba-īñ hāl-e-tabāhe gaahe

rahte kis shohre meñ ho tum se to milnā pyāre
ittifāqiya hai ba.ad az do sah maahe gaahe

ham tamāzat meñ tire hukm se leñ haiñ saaqī
sāya-e-tāk meñ yak-lahza panāhe gaahe

ham gadāoñ ko hai taslīm-o-razā se sarokār
multajī haiñ na ze-mun.im ne ze-shāhe gaahe

be-zabāñ kulah-e-sabzī kī jagah ai nau-ḳhat
na ugā ḳhaak se merī par-e-kāhe gaahe

ai 'muhib' jurm-e-mohabbat ke sivā aalam meñ
qatl-e-āshiq hī sunā hai ba-gunāhe gaahe

nahin duniya mein siwa KHar-o-KHas-e-kucha-e-dost
sar-e-shorida ki KHwahish ba-kulahe gahe

KHun-e-ushshaq ka dawa mere qatil tujh par
hote isbaat na dekha ba-gawahe gahe

hai bahaar aane ki kuchh dhum ki aage to na tha
dil-e-diwana ba-in haal-e-tabahe gahe

rahte kis shohre mein ho tum se to milna pyare
ittifaqiya hai baad az do sah mahe gahe

hum tamazat mein tere hukm se len hain saqi
saya-e-tak mein yak-lahza panahe gahe

hum gadaon ko hai taslim-o-raza se sarokar
multaji hain na ze-munim ne ze-shahe gahe

be-zaban kulah-e-sabzi ki jagah ai nau-KHat
na uga KHak se meri par-e-kahe gahe

ai 'muhib' jurm-e-mohabbat ke siwa aalam mein
qatl-e-ashiq hi suna hai ba-gunahe gahe

Source: Deewan-e-Waleeullah Muhib