zamīñ-nazhād haiñ lekin zamāñ meñ rahte haiñ
makāñ nasīb nahīñ lā-makāñ meñ rahte haiñ

vo Dol Dāleñ kisī kār-e-pā.edār kā kyā
jo be-sabātī-e-umr-e-ravāñ meñ rahte haiñ

ham aise ahl-e-chaman gosha-e-qafas meñ bhī
hisāb-e-ḳhār-o-ḳhas-e-āshiyāñ meñ rahte haiñ

na būd-o-bāsh ko pūchho ki ham faqīr-manash
suḳhan ke ma.abad-e-be-sā.ebāñ meñ rahte haiñ

kahāñ talāsh karoge hameñ ki ham to mudām
huzūrī-e-dil-e-be-ḳhānumāñ meñ rahte haiñ

nashe kī lahr meñ ḳhum ḳhum luñDhā ke āb-e-hayāt
sarāb-e-zindagī-e-jāvedāñ meñ rahte haiñ

na.ī mohabbateñ 'ḳhālid' purānī dostiyāñ
azāb-e-kashmakash-e-be-amāñ meñ rahte haiñ

zamin-nazhad hain lekin zaman mein rahte hain
makan nasib nahin la-makan mein rahte hain

wo Dol Dalen kisi kar-e-paedar ka kya
jo be-sabaati-e-umr-e-rawan mein rahte hain

hum aise ahl-e-chaman gosha-e-qafas mein bhi
hisab-e-KHar-o-KHas-e-ashiyan mein rahte hain

na bud-o-bash ko puchho ki hum faqir-manash
suKHan ke mabad-e-be-saeban mein rahte hain

kahan talash karoge hamein ki hum to mudam
huzuri-e-dil-e-be-KHanuman mein rahte hain

nashe ki lahr mein KHum KHum lunDha ke aab-e-hayat
sarab-e-zindagi-e-jawedan mein rahte hain

nai mohabbaten 'KHalid' purani dostiyan
azab-e-kashmakash-e-be-aman mein rahte hain

Source: Rooh-e-Ghazal,Pachas Sala Intekhab