qazā se qarz kis mushkil se lī umr-e-baqā ham ne
matā-e-zindagī de kar kiyā ye qarz adā ham ne

hameñ kis ḳhvāb se lalchā.egī ye pur-fusūñ duniyā
khurach Daalā hai lauh-e-dil se harf-e-mudda.ā ham ne

kareñ lab ko na ālūda kabhī harf-e-shikāyat se
shi.ār apnā banāyā sheva-e-sabr-o-razā ham ne

ham us ke haiñ sarāpā adbadā kar us se kyā māñgeñ
uThāyā hai kabhī ai mudda.ī dast-e-duā ham ne

shahīdān-e-vafā kī manqabat likhte rahe lekin
na kī arzī ḳhudāoñ kī kabhī hamd-o-sanā ham ne

parakhne vaale parkheñge isī me.aar par ham ko
jahāñ se kyā liyā ham ne jahāñ ko kyā diyā ham ne

vahī insāñ jahāñ jaao vahī hirmāñ jidhar dekho
bapā-e-ḳhufta kī sayyāhī-e-mulk-e-ḳhudā ham ne

luTā zauq-e-safar bhī kārvāñ kā aise lagtā hai
sunā har taaza pesh-āhañg kā shor-e-darā ham ne

sitam-ārāo sun lo āḳhirī bardāsht kī had tak
sahā har nā-ravā ham ne sunā har nā-sazā ham ne

ye duzdīda nigāheñ haiñ ki dil lene kī rāheñ haiñ
hamesha dīda-o-dānista khaa.ī hai ḳhatā ham ne

kashākash ham se pūchhe koī nā-āsūda ḳhvāhish kī
hasīnoñ se bahut bāñdhe haiñ paimān-e-vafā ham ne

kiyā takmīl-e-naqsh-e-nā-tamām-e-shauq kī ḳhātir
jau tum se ho sakā tum ne jau ham se ho sakā ham ne

'irāqī' kī tarah 'ḳhālid' ko kyuuñ badnām karte haiñ
na dekhā koī aisā ḳhush-navاa-e-benavā ham ne

qaza se qarz kis mushkil se li umr-e-baqa hum ne
mata-e-zindagi de kar kiya ye qarz ada hum ne

hamein kis KHwab se lalchaegi ye pur-fusun duniya
khurach Dala hai lauh-e-dil se harf-e-muddaa hum ne

karen lab ko na aaluda kabhi harf-e-shikayat se
shiar apna banaya shewa-e-sabr-o-raza hum ne

hum us ke hain sarapa adbada kar us se kya mangen
uThaya hai kabhi ai muddai dast-e-dua hum ne

shahidan-e-wafa ki manqabat likhte rahe lekin
na ki arzi KHudaon ki kabhi hamd-o-sana hum ne

parakhne wale parkhenge isi mear par hum ko
jahan se kya liya hum ne jahan ko kya diya hum ne

wahi insan jahan jao wahi hirman jidhar dekho
bapa-e-KHufta ki sayyahi-e-mulk-e-KHuda hum ne

luTa zauq-e-safar bhi karwan ka aise lagta hai
suna har taza pesh-ahang ka shor-e-dara hum ne

sitam-arao sun lo aaKHiri bardasht ki had tak
saha har na-rawa hum ne suna har na-saza hum ne

ye duzdida nigahen hain ki dil lene ki rahen hain
hamesha dida-o-danista khai hai KHata hum ne

kashakash hum se puchhe koi na-asuda KHwahish ki
hasinon se bahut bandhe hain paiman-e-wafa hum ne

kiya takmil-e-naqsh-e-na-tamam-e-shauq ki KHatir
jau tum se ho saka tum ne jau hum se ho saka hum ne

'iraqi' ki tarah 'KHalid' ko kyun badnam karte hain
na dekha koi aisa KHush-nawاa-e-benawa hum ne

Source: Book : sarab-e-sahil (Pg. 53) Author : Abdul Aziz Khalid Publication : Maqbool Acedami, Lahore (2010) Edition : 2010