aanā hai to aa jaao yak aan mirā sāhab
ik aan ke haiñ ham bhī mehmān mirā sāhab

muddat se tumhārā maiñ sau jaan se huuñ āshiq
kyuuñ jaan ke hote ho anjān mirā sāhab

ġhusse ho uThe mujh par kyuuñ tīr-o-kamāñ le kar
maiñ hone ko baiThā huuñ qurbān mirā sāhab

nāgāh sanam yaaro mujh se jo milā aa kar
mujh par ye ḳhudā kā hai ehsān mirā sāhab

ye banda ho yā tum ho vaañ ġhair na ho koī
is Dhab ke hai milne kā armān mirā sāhab

kuchh yaad nahīñ mujhe ko kāfir huuñ musalmāñ huuñ
hai ġham meñ tire yaañ tak nisyān mirā sāhab

jo ishq kī manzil ke haiñ ahl-e-kamāl un kā
hai shukr-o-shikāyat meñ nuqsān mirā sāhab

saaf ā.īna-e-dil meñ raushan hai jamāl us kā
bar-aks hai ik aalam hairān mirā sāhab

sau tarah kahūñ dil kā ahvāl huzūr us ke
mere to nahīñ rahne ausān mirā sāhab

ham ishq kī daulat se ik kunj-e-qanā.at meñ
karte haiñ faqīrāna guzrān mirā sāhab

yaañ had se qadam bāhar rakhne koī paayā hai
is jurm meñ sar leñ haiñ tāvān mirā sāhab

munsif ho 'muhib' dil meñ is baat ko Tuk soche
jab be-sar-o-sāmāñ ho insān mirā sāhab

kyā saath le aayā thā le jā.egā kyā yaañ se
phir chāhiye kis ḳhātir sāmān mirā sāhab

ma.anī meñ vo kāTeñ haiñ auqāt bahut be-ġham
jo shaḳhs ba-sūrat haiñ uryān mirā sāhab

shamshīr-e-barhana ke jauhar nazar aate haiñ
insāf kī āñkhoñ ke darmyān mirā sāhab

aana hai to aa jao yak aan mera sahab
ek aan ke hain hum bhi mehman mera sahab

muddat se tumhaara main sau jaan se hun aashiq
kyun jaan ke hote ho anjaan mera sahab

ghusse ho uThe mujh par kyun tir-o-kaman le kar
main hone ko baiTha hun qurban mera sahab

nagah sanam yaro mujh se jo mila aa kar
mujh par ye KHuda ka hai ehsan mera sahab

ye banda ho ya tum ho wan ghair na ho koi
is Dhab ke hai milne ka arman mera sahab

kuchh yaad nahin mujhe ko kafir hun musalman hun
hai gham mein tere yan tak nisyan mera sahab

jo ishq ki manzil ke hain ahl-e-kamal un ka
hai shukr-o-shikayat mein nuqsan mera sahab

saf aaina-e-dil mein raushan hai jamal us ka
bar-aks hai ek aalam hairan mera sahab

sau tarah kahun dil ka ahwal huzur us ke
mere to nahin rahne ausan mera sahab

hum ishq ki daulat se ek kunj-e-qanaat mein
karte hain faqirana guzran mera sahab

yan had se qadam bahar rakhne koi paya hai
is jurm mein sar len hain tawan mera sahab

munsif ho 'muhib' dil mein is baat ko Tuk soche
jab be-sar-o-saman ho insan mera sahab

kya sath le aaya tha le jaega kya yan se
phir chahiye kis KHatir saman mera sahab

mani mein wo kaTen hain auqat bahut be-gham
jo shaKHs ba-surat hain uryan mera sahab

shamshir-e-barhana ke jauhar nazar aate hain
insaf ki aankhon ke darmyan mera sahab

Source: Deewan-e-Waleeullah Muhib