marne kī puḳhta-ḳhayālī meñ jiine kī ḳhāmī rahne do
ye istidlālī tark karo bas istifhāmī rahne do

ye tez-ravī ye tursh-ruī chalne kī nahīñ hai duur talak
shabnam-nazarī shīrīñ-suḳhanī āsūda-gāmī rahne do

sau dasht samundar chhāno par aate raho qarya-e-dil tak bhī
bairūnī havā ke jhoñkoñ meñ ik mauj-e-maqāmī rahne do

ab tanz pe kyuuñ majbūr karo ham ġhair mulavvis logoñ ko
fan pesh karo ye fahrist-e-asmā-e-girāmī rahne do

raftār par itnī daad na do manzil na mirī chhīno mujh se
az-rāh-e-hunar mire hisse kī thoḌī nākāmī rahne do

jatlāte phiro gar qad apnā paimā.ish kī mohlat to na do
is qāmat-e-bālā ke sadqe ye zūd-qayāmī rahne do

ab ham se pareshāñ-hālāñ ko kyā amn-o-sukūñ raas aa.egā
yūñhī bohrānī chalne do saarā hañgāmī rahne do

ai 'sāz' vagarna log tumheñ Thahrā.eñge sāñpoñ kā maskan
is shahr-e-aks-gazīda meñ ā.īna-fāmī rahne do

marne ki puKHta-KHayali mein jine ki KHami rahne do
ye istidlali tark karo bas istifhami rahne do

ye tez-rawi ye tursh-rui chalne ki nahin hai dur talak
shabnam-nazari shirin-suKHani aasuda-gami rahne do

sau dasht samundar chhano par aate raho qarya-e-dil tak bhi
bairuni hawa ke jhonkon mein ek mauj-e-maqami rahne do

ab tanz pe kyun majbur karo hum ghair mulawwis logon ko
fan pesh karo ye fahrist-e-asma-e-girami rahne do

raftar par itni dad na do manzil na meri chhino mujh se
az-rah-e-hunar mere hisse ki thoDi nakaami rahne do

jatlate phiro gar qad apna paimaish ki mohlat to na do
is qamat-e-baala ke sadqe ye zud-qayami rahne do

ab hum se pareshan-haalan ko kya amn-o-sukun ras aaega
yunhi bohrani chalne do sara hangami rahne do

ai 'saz' wagarna log tumhein Thahraenge sanpon ka maskan
is shahr-e-aks-gazida mein aaina-fami rahne do

Source: Book : sargoshiyan zamanon ki (Pg. 51)