Subscribe to our newsletter and get our newest updates

Abdul Ahad Saaz

  • Ghazal


lafzon ke sahra mein kya mani ke sarab dikhana bhi


lafzoñ ke sahrā meñ kyā ma.anī ke sarāb dikhānā bhī
koī suḳhan sahābī koī naġhma naḳhlistāna bhī

ik muddat se hosh-o-ḳhabar kī ḳhāmoshī raa.ij hai yahāñ
kaash dayār-e-asr meñ gūñje koī sadā mastāna bhī

nape-tule āhañg pe kab tak sambhal sambhal kar raqs kareñ
koī dhun dīvānī koī harakat majnūnānā bhī

shahr se bāhar kohsāroñ ke biich ye Thahrā Thahrā din
kitnā apnā sā lagtā hai aaj dil-e-begāna bhī

ek tilismī raah fasīl-e-tan se navāh-e-jāñ tak hai
jis kī khoj meñ kho jaao to mumkin hai pā jaanā bhī

āgāhī ma.akūs safar hai dānish-gāh ke raste kā
jis kā har jānā-pahchānā manzar hai an-jānā bhī

bol vahī haiñ sur bhī vahī mizrāb kī jumbish badle to
yās-o-alam ke tāroñ meñ muzmar hai ek tarāna bhī

hāsil aur lā-hāsil par ab vaise bhī kiyā ġhaur kareñ
aur chhalakne vaalā ho jab sāñsoñ kā paimāna bhī

kitnī aag kashākash kitnī kitnā tahammul hai darkār
'sāz' koī āsān nahīñ hai lafzoñ ko pighlānā bhī

lafzon ke sahra mein kya mani ke sarab dikhana bhi
koi suKHan sahabi koi naghma naKHlistana bhi

ek muddat se hosh-o-KHabar ki KHamoshi raij hai yahan
kash dayar-e-asr mein gunje koi sada mastana bhi

nape-tule aahang pe kab tak sambhal sambhal kar raqs karen
koi dhun diwani koi harakat majnunana bhi

shahr se bahar kohsaron ke bich ye Thahra Thahra din
kitna apna sa lagta hai aaj dil-e-begana bhi

ek tilismi rah fasil-e-tan se nawah-e-jaan tak hai
jis ki khoj mein kho jao to mumkin hai pa jaana bhi

aagahi makus safar hai danish-gah ke raste ka
jis ka har jaana-pahchana manzar hai an-jaana bhi

bol wahi hain sur bhi wahi mizrab ki jumbish badle to
yas-o-alam ke taron mein muzmar hai ek tarana bhi

hasil aur la-hasil par ab waise bhi kiya ghaur karen
aur chhalakne wala ho jab sanson ka paimana bhi

kitni aag kashakash kitni kitna tahammul hai darkar
'saz' koi aasan nahin hai lafzon ko pighlana bhi

Videos
This video is playing from YouTube Videos
This video is playing from YouTube Abdul Ahad Saaz Abdul Ahad Saaz RECITATIONS Abdul Ahad Saaz



00:00/00:00 lafzon ke sahra mein kya mani ke sarab dikhana bhi Abdul Ahad Saaz

Source: Book : Sargoshiyan Zamanoan ki (Pg. 113) Author : Abdul Ahad Saaz Publication : Adshot Publication (2003) Edition : 2003

Leave a comment

+